Kreu i grupit parlamentar të Partisë Demokratike, Gazment Bardhi, i bëri thirrje Prokurorisë së Posaçme (SPAK) që t’i drejtohet menjëherë Kuvendit me kërkesën për heqjen e imunitetit të deputetes Belinda Balluku dhe autorizimin për arrestimin e saj, duke argumentuar se pozita e saj penale është rënduar me dyshime të reja për korrupsion pasiv dhe pastrim parash.
Në një konferencë për mediat, Bardhi deklaroi se SPAK po përballet me një “test vendimtar të besueshmërisë”, duke kërkuar që të zbatojë të njëjtin standard që përdori në dhjetor 2025, kur kërkoi arrestimin e Ballukut pas shtimit të akuzave ndaj saj.
Sipas tij, njoftimi i SPAK-ut i 4 qershorit 2026 për sekuestrimin e një vile në Dhërmi, e dyshuar si pasuri e përfituar nga ryshfeti dhe e fshehur përmes kontratave fiktive, e rëndon më tej pozitën penale të ish-zëvendëskryeministres. Bardhi ngriti gjithashtu pikëpyetje mbi faktin se ndërtuesi që dyshohet se ka ndihmuar në fshehjen e kësaj pasurie është, sipas tij, i njëjti që ka ndërtuar edhe vilën e kryeministrit Edi Rama në Surrel.
Deputeti demokrat akuzoi SPAK-un për zbatim të standardeve të dyfishta dhe shtroi tre pyetje publike: pse nuk i është drejtuar ende Kuvendit për heqjen e imunitetit të Ballukut, kush po pengon zbatimin e ligjit dhe nëse ka pasur ndërhyrje politike për të shtyrë një kërkesë të tillë. Sipas tij, çdo ditë pa një veprim nga SPAK dëmton besimin te drejtësia.
Në përfundim, Bardhi theksoi se Prokuroria e Posaçme mund ta kalojë “testin e besueshmërisë” vetëm duke iu drejtuar pa vonesë Kuvendit me kërkesën për heqjen e imunitetit dhe arrestimin e Belinda Ballukut.
