Kreu i Partisë Demokratike, Sali Berisha, ka bërë akuza të forta gjatë mbledhjes së grupit parlamentar të PD, ku ka publikuar sipas tij listën e pasurive të sekuestruara në kuadër të hetimeve të SPAK.
Berisha ironizoi ish-drejtoreshën e AKSHI-t, Mirlinda Karçanaj, duke e cilësuar si “të varfër”, ndërsa renditi një sërë pasurish që sipas tij përfshijnë apartamente në Tiranë, prona në Qerret dhe Sauk, automjet dhe llogari bankare në disa institucione financiare.
Ai u ndal gjithashtu te pasuritë e Ergys Agasit, për të cilin deklaroi se zotëron dhjetëra prona, përfshirë sipërfaqe të mëdha toke dhe pyjesh në zonën e Petrelës, ndërtesa, apartamente, garazhe dhe automjete luksoze.
Në deklaratën e tij, Berisha përmendi edhe pasuri të lidhura me Ermal Beqirajn, duke përfshirë prona në Tiranë dhe bregdet, si dhe mjete lundruese si jaht.
Sipas tij, këto të dhëna tregojnë përmasa të mëdha të korrupsionit dhe kërkoi hetim të plotë për të gjitha rastet, duke kritikuar edhe ritmin e procedurave hetimore.
Nga ana tjetër, këto pretendime mbeten pjesë e debatit politik, ndërsa pritet reagimi i palëve të përmendura dhe institucioneve përkatëse.
