Presidenti i SHBA, Donald Trump, deklaroi në një intervistë për CNN se nuk është i shqetësuar nëse Irani do të shndërrohet në një shtet demokratik, për sa kohë që udhëheqësi i ri i vendit trajton mirë Shtetet e Bashkuara, Izraelin dhe vendet e tjera të Lindjes së Mesme.
Trump tha se pas operacioneve ushtarake të fundit, Irani nuk është më i njëjti vend si një javë më parë.
“Irani nuk është i njëjti vend që ishte një javë më parë. Atëherë ishte i fuqishëm, ndërsa tani është neutralizuar,” u shpreh ai gjatë një interviste telefonike për CNN.
Presidenti amerikan theksoi se është i hapur edhe për mundësinë që në krye të Iranit të jetë një lider fetar, jo domosdoshmërisht një udhëheqës i zgjedhur në mënyrë demokratike.
“Nuk po them se duhet patjetër një shtet demokratik. Duhet një lider i drejtë që të trajtojë mirë Shtetet e Bashkuara, Izraelin dhe vendet e tjera të rajonit,” deklaroi Trump.
Ai e krahasoi situatën me zhvillimet në Venezuelë, duke thënë se ndryshimi i lidershipit në Iran mund të ndodhë lehtësisht.
Trump gjithashtu vlerësoi operacionin ushtarak amerikan kundër Iranit, duke e cilësuar atë si një sukses të madh.
“Operacioni është një 12 apo edhe 15 në një shkallë nga 1 deri në 10,” tha ai.
Presidenti amerikan minimizoi gjithashtu shqetësimet për rritjen e çmimit të karburantit, duke thënë se çdo rritje do të jetë afatshkurtër dhe se situata në Ngushticën e Hormuzit është nën kontroll.
Në intervistë, Trump foli edhe për Kubën, duke thënë se regjimi në ishull mund të “bjerë shumë shpejt”, ndërsa theksoi se aktualisht prioriteti kryesor i administratës së tij mbetet konflikti me Iranin.
