Një përkeqësim i ndjeshëm i motit pritet të godasë Greqinë, me shira të rrëmbyeshëm, stuhi dhe erëra të forta që do të prekin kryesisht zonat perëndimore dhe veriore të vendit.
Sipas parashikimeve, fenomenet më intensive do të regjistrohen në Korfuz, Paksos dhe rajonin e Epirit deri në pasdite, ndërsa Maqedonia Lindore dhe Trakia do të përfshihen nga reshje dhe stuhi që nga orët e para të ditës deri në mbrëmje. Në zonat malore qendrore dhe veriore priten edhe reshje të dendura dëbore.
Kushtet atmosferike favorizojnë gjithashtu transportin e pluhurit afrikan, i cili do të prekë kryesisht Greqinë lindore dhe jugore, përfshirë Peloponezin, Kretën dhe Atikën.
Erërat pritet të arrijnë forcën 7-8 ballë në Detin Jon dhe Egje, ndërsa në lindje të Egjeut mund të shkojnë deri në 9 ballë Beaufort, duke e bërë detin veçanërisht të trazuar.
Situata meteorologjike parashikohet të përmirësohet gradualisht në mbrëmje, por autoritetet këshillojnë kujdes të shtuar për lundrimet dhe aktivitetet bregdetare. Temperaturat do të mbeten relativisht të larta për sezonin, duke u luhatur nga 17 deri në 20°C në shumicën e zonave, ndërsa në veri nga 13 deri në 15°C. Në Kretë, termometri mund të shënojë deri në 22-23°C.
