Kurora e Perandoreshës franceze Eugénie është gjetur e dëmtuar pas grabitjes spektakolare në Muzeun Louvre tetorin e kaluar, por autoritetet thonë se ajo mbetet pothuajse e paprekur dhe mund të restaurohet plotësisht.
Sipas muzeut, hajdutët vodhën bizhuteri me vlerë rreth 88 milionë euro, por lanë pas kurorën e mbuluar me diamante gjatë arratisjes. Ajo ishte deformuar rëndë pasi grabitësit tentuan ta nxirrnin përmes një hapësire të ngushtë të prerë në vitrinën prej xhami.
Objekti historik i shekullit XIX ka humbur një nga tetë shqiponjat prej ari që e zbukuronin, por ruan 56 smeralde dhe pothuajse të gjithë 1,354 diamantët – përveç rreth dhjetë prej tyre.
Muzeu ka publikuar fotografitë e para të kurorës pas grabitjes dhe ka bërë të ditur se një komitet ekspertësh, i drejtuar nga presidentja e institucionit, Laurence des Cars, do të mbikëqyrë procesin e restaurimit, i cili pritet ta rikthejë objektin në gjendjen origjinale pa nevojë për rindërtim.
Grabitja ndodhi më 19 tetor, kur një grup personash përdori një platformë mekanike të vendosur në një automjet të vjedhur për të hyrë në Galerinë e Apollonit përmes një ballkoni pranë lumit Sena. Dy prej tyre prenë dritaren me mjete elektrike, kërcënuan rojet dhe thyen vitrinat ku ruheshin bizhuteri që dikur i përkisnin familjes mbretërore franceze.
Prokurorët thanë se autorët qëndruan brenda muzeut më pak se katër minuta para se të largoheshin me dy skuterë. Deri më tani janë arrestuar katër të dyshuar, ndërsa organizatori i grabitjes ende nuk është identifikuar.
Shtatë objekte të tjera të vjedhura, përfshirë një diademë me diamante, varëse, vathë dhe karfica, vazhdojnë të jenë të zhdukura.
