Ministria e Punëve të Brendshme e Kosovës ka njoftuar se ka nisur një fushatë informuese për zbatimin e Ligjit për të Huajt dhe Ligjit për Automjetet, e cila po zhvillohet në të gjitha pikat kufitare të Kosovës, si dhe në Aeroportin Ndërkombëtar të Prishtinës “Adem Jashari”.
Sipas njoftimit zyrtar, fushata ka për qëllim informimin dhe ndërgjegjësimin e qytetarëve, përfshirë edhe shtetasit nga Shqipëria dhe vendet e tjera, lidhur me procedurat ligjore të hyrjes dhe qëndrimit në Kosovë, si dhe me rregullat e drejtimit të automjeteve në territorin e këtij shteti.
Autoritetet kosovare bëjnë të ditur se fushata ka nisur nga dita e djeshme dhe do të zgjasë deri më 15 mars, me synimin për të shmangur paqartësitë dhe shkeljet ligjore gjatë qarkullimit dhe qëndrimit në Kosovë.
Ministria e Punëve të Brendshme e Kosovës ka falënderuar zyrtarët policorë për angazhimin dhe profesionalizmin, si dhe qytetarët për bashkëpunimin gjatë zbatimit të kësaj nisme informuese.
