Kryeministri Edi Rama ka reaguar ashpër ndaj gazetarit Blendi Fevziu, pas deklaratave të bëra në emisionin Opinion, ku moderatori pretendoi se kishte “fakte” që disa ministra ndodheshin jashtë vendit për udhëtime private gjatë fundjavave, ndërsa në televizione shfaqeshin pamje të tyre në terren.
Në një reagim të gjatë dhe me tone ironike, Rama e cilëson Fevziun si një “influencer që është bërë si llazoret e opozitës”, duke e akuzuar se ka mashtruar publikun dhe ka hedhur akuza të pambështetura me prova.
Sipas Kryeministrit, pretendimi për të paktën shtatë ministra në udhëtime private është një shpifje e pastër, e cila – sipas tij – nuk u mbështet më pas me asnjë fakt konkret, as kur vetë Fevziu reagoi pas postimit të Ramës.
Rama thekson se gjatë javëve të fundit, për shkak të kushteve të vështira atmosferike, ministrat kanë qenë të angazhuar ditë e natë në terren, çka e bën edhe më absurde akuzën e hedhur publikisht në një emision me audiencë të lartë.
“E dija që Fevziu gënjeu, siç e di kur gënjejnë llazoret demokratikase të sallonit të tij, por këtë herë shpifja erdhi drejtpërdrejt nga moderatori,” shkruan Rama.
Kryeministri shprehet se nuk është befasuar nga akuzat e opozitës nëpër studio televizive, por e konsideron të papranueshme që një deklaratë e tillë të artikulohet nga vetë drejtuesi i emisionit, duke cenuar besimin e shikuesve.
Në reagimin e tij, Rama i bën apel publik Fevziut të kërkojë ndjesë, duke theksuar se audienca e Opinion nuk përbëhet vetëm nga mbështetës të qeverisë, por nga qytetarë me bindje të ndryshme politike, të cilët – sipas tij – janë keqtrajtuar me një akuzë pa prova.
“Nëse nuk i frenon dot shpifësit që fton në studio, minimalisht mos u bëj vetë burim i tyre,” nënvizon Rama.
Në përmbyllje, Kryeministri shprehet se klima e akuzave dhe shpifjeve në debatet politike televizive ka arritur një pikë shqetësuese, duke shtuar se një figurë me peshë mediatike si Fevziu mund dhe duhet të japë një shembull pozitiv, duke pranuar përgjegjësinë për një deklaratë të pasaktë.
