Shtetet e Bashkuara kanë sekuestruar një super anije-cisternë të ngarkuar me naftë pranë brigjeve të Venezuelës, një veprim që rrezikon të përshkallëzojë më tej tensionet mes dy vendeve. Presidenti Donald Trump e konfirmoi personalisht operacionin, duke e quajtur mjetin lundrues “anija më e madhe e sekuestruar ndonjëherë”.
“Siç e dini ndoshta, sapo kemi sekuestruar një anije-cisternë në bregun e Venezuelës. Shumë e madhe, ndoshta më e madhja që është kapur,” deklaroi Trump, pa dhënë arsye të detajuara për ndërhyrjen. I pyetur për naftën në bord, ai shtoi: “E mbajmë ne, besoj.”
Pamjet e operacionit: Forcat amerikane zbresin me helikopter në bord
Prokurorja e Përgjithshme, Pam Bondi, publikoi një video ku shihen forcat amerikane duke u rappeluar nga një helikopter mbi anije, e më pas duke hyrë në kuvertë me armë në duar.
Sipas Bondi, operacioni u krye nga FBI, Homeland Security Investigations dhe Rojat Bregdetare të SHBA, me mbështetje nga “Departamenti i Luftës”, për zbatimin e një urdhri federal sekuestrimi.
Ajo tha se anija-cisternë ishte prej vitesh nën sanksione të SHBA-së, pasi dyshohej se ishte pjesë e një rrjeti të paligjshëm transporti nafte që mbështeste organizata të huaja terroriste.
Operacioni u krye në ujëra ndërkombëtare dhe, sipas një zyrtari të lartë amerikan, u zhvillua pa incidente apo të plagosur, si nga pala amerikane, ashtu edhe nga ekuipazhi.
View this post on Instagram
Anija “Skipper”: cisternë me naftë venezueliane dhe lidhje me naftën iraniane
Anija-cisternë e sekuestruar, e quajtur Skipper, transportonte naftë venezueliane dhe më parë ishte lidhur me ngarkesa të naftës iraniane. Një gjykatës federal kishte lëshuar urdhër sekuestrimi për shkak të këtyre lidhjeve.
Anija ishte nisur drejt Kubës dhe më pas drejt tregjeve aziatike, pasi ishte rishitur nga ndërmjetës kubanë, thanë zyrtarët amerikanë. Ata lanë të hapur mundësinë e sekuestrimeve të tjera në javët në vijim, si pjesë e fushatës së presionit ndaj regjimit të Nicolás Maduro.
Reagimi i Venezuelës: “Akt piraterie ndërkombëtare”
Qeveria e Venezuelës e dënoi ashpër sekuestrimin, duke e cilësuar një shkelje flagrante të së drejtës ndërkombëtare.
“Nuk ka të bëjë me migracionin, as me drogën, as me demokracinë. Bëhet fjalë për pasuritë tona natyrore, për naftën dhe energjinë që i përket popullit venezuelian,” thuhet në deklaratën e Caracasit, që e etiketoi veprimin si “pirateri ndërkombëtare”.
Venezuela njoftoi se do të apelojë vendimin në të gjitha instancat ndërkombëtare.
Presidenti Maduro, në një fjalim të paralajmëruar më herët, nuk e përmendi fare incidentin.
SHBA rrit presionin ushtarak dhe diplomatik në Karaibe
Ky operacion vjen pas një serie veprimesh të SHBA në rajon, përfshirë:
- vendosjen e mijëra trupave dhe një grup aeroplanmbajtës;
- sulme ndaj mjeteve të dyshuara të trafikut të drogës;
- paralajmërime të përsëritura të Trump për veprime të mundshme tokësore.
Në goditjet e fundit kundër gomoneve të trafikut, ushtria amerikane ka vrarë 87 persona dhe ka shkatërruar 23 mjete detare.
Ndërkohë Kuba – destinacioni i parë i cisternës – po përballet me një krizë të rëndë energjitike, ku ndërprerjet e energjisë zgjasin me orë dhe ndonjëherë me ditë, për shkak të varësisë nga importet e naftës.
Rritje e tensioneve SHBA–Venezuelë
Sekuestrimi i Skipper pritet të trazojë më tej marrëdhëniet mes Uashingtonit dhe Caracasit, ndërsa administrata Trump po shton presionin për rrëzimin e Maduros.
Autoritetet amerikane kanë paralajmëruar se operacione të tjera të ngjashme mund të jenë në horizont.
