Administrata e presidentit Donald Trump ka pezulluar të gjitha vendimet për azil, pavarësisht kombësisë së aplikantëve, pas sulmit të ndodhur në Uashington DC ku dy pjesëtarë të Gardës Kombëtare u qëlluan me armë, një prej të cilëve humbi jetën. Lajmin e konfirmoi drejtori i USCIS, Joseph Edlow, i cili deklaroi se pezullimi do të zgjasë “derisa të garantohet që çdo i huaj të verifikohet dhe kontrollohet në maksimum”.
Ky vendim erdhi vetëm pak orë pasi presidenti Trump njoftoi se do të vendosë “pezullim të përhershëm të migracionit” nga të gjitha “vendet e botës së tretë”, duke ashpërsuar më tej qasjen e tij ndaj emigracionit gjatë mandatit të dytë.
Sipas CBS News, agjencia e emigracionit është urdhëruar të mos miratojë, refuzojë apo mbyllë asnjë aplikim për azil, megjithëse punonjësit mund të vijojnë përpunimin e dosjeve deri në pikën para marrjes së vendimit. Nuk janë dhënë detaje të tjera për afatin apo mënyrën e zbatimit.
Pezullimi vjen në vazhdën e një serie vendimesh të reja pas ngjarjes së së mërkurës, ku autoritetet kanë akuzuar një shtetas afgan, Rahmanullah Lakanwal, për sulmin. Lakanwal erdhi në SHBA në vitin 2021 nën një program të posaçëm për afganët që kishin punuar me forcat amerikane në Afganistan, ku ai kishte qenë pjesë e njësive elitare “Zero Unit” që bashkëpunonin me CIA-n.
Zyrtarët amerikanë thonë se ai ishte verifikuar disa herë, si gjatë punës me CIA-n, ashtu edhe para udhëtimit në SHBA. Megjithatë, raportimet mediatike thonë se Lakanwal vuante nga probleme të shëndetit mendor, të cilat ishin shfaqur pas detyrës së tij në Afganistan. Ai kishte marrë statusin e azilit pasi Trump u rikthye në detyrë, ndërsa kërkesa e tij për green card është ende në proces.
Administrata Trump ka marrë edhe masa të tjera të gjera, përfshirë rishikimin e green card-eve të dhëna qytetarëve nga 19 vende, mes tyre Afganistani, Irani, Somalia, Haitit, Venezuela dhe Kuba. Trump ka deklaruar gjithashtu se do të “heqë të gjitha përfitimet federale për jo-shtetasit” dhe vazhdimisht ka fajësuar refugjatët për “problemet sociale” në SHBA.
Deklaratat kanë shkaktuar reagime të forta, ndërsa Kombet e Bashkuara kanë paralajmëruar SHBA-në të respektojë detyrimet ndërkombëtare për mbrojtjen e azilkërkuesve. Ndërkaq eksperti Jeremy McKinney nga Shoqata Amerikane e Avokatëve të Emigracionit e cilësoi reagimin e shpejtë ndaj ngjarjes si “gjah ndaj emigrantëve”, duke theksuar se radikalizimi apo problemet mendore nuk lidhen me ngjyrën apo origjinën e një personi.
Pezullimi i azileve dhe politikat e reja pritet të përballen me sfida të forta ligjore, teksa SHBA hyn në një fazë të re tensioni për çështjet e emigracionit.
