Një apartament në rrugën “Isuf Sokoli” në Shkodër u përfshi nga flakët mbrëmjen e djeshme, duke shkaktuar panik tek banorët e zonës. Zjarri ra në katin e tretë të një pallati dhe u përhap me shpejtësi në ambientet e brendshme.
Në momentin e shpërthimit të flakëve, në banesë ndodheshin dy të moshuar, të cilët fatmirësisht arritën të largohen menjëherë dhe pa pësuar lëndime. Reagimi i shpejtë i tyre shmangu një tragjedi të mundshme.
Forcat zjarrfikëse dhe policia mbërritën menjëherë në vendngjarje, duke punuar për të izoluar zjarrin dhe për të parandaluar përhapjen e tij në apartamentet e tjera. Situata është vënë nën kontroll dhe po hetohen shkaqet e rënies së zjarrit.
