Dioqeza e Sapës dhe mbarë komuniteti katolik në Shqipëri janë tronditur sot nga lajmi i ndarjes nga jeta të Ipeshkvit të tyre, Imzot Simon Kulli, në moshën vetëm 52-vjeçare. Sipas informacioneve paraprake, ai ka ndërruar jetë mëngjesin e së shtunës pas një arresti kardiak.
Imzot Simon Kulli lindi më 14 shkurt 1973 në fshatin Pistull të Dioqezës së Sapës, 20 kilometra nga Shkodra, ku kreu shkollën fillore dhe të mesme. Më 2 shkurt 1992 hyri në Seminarin Ndërdioqezan Shqiptar “Zoja e Këshillit të Mirë” në Shkodër, ku kaloi dy vite përgatitore për studimet filozofike e teologjike. Në vitin 1994 filloi studimet e Filozofisë dhe në vitin 1996 ato të Teologjisë. Më 14 shtator 1999 u shugurua diakon në Katedralen e Shkodrës. Gjatë kësaj periudhe shërbeu fillimisht në katedrale me Dom Lucjan Avgustinin, ndërsa më pas në Dajç të Zadrimës me Dom Injac Demën.
Më 29 qershor 2000, në vitin Jubilar, ai u shugurua meshtar në Katedralen e Shkodrës nga Imzot Angelo Massafra, së bashku me katër meshtarë të tjerë shqiptarë, në shugurimet e para pas 46 viteve të regjimit komunist. Pas shugurimit u emërua në Dajç të Zadrimës si ndihmës famullitar dhe njëkohësisht shërbeu si Sekretar i Ipeshkëvit të Sapës, Imzot Dodë Gjergjit.
Në vitin 2002 u emërua Kancelar i Dioqezës së Sapës. Prej vitit 2006 shërbente si famullitar i Katedrales “Shën Tereza e Kalkutës” në Vau-Dejës. Nga viti 2001 deri në vitin 2012 ishte drejtor i Caritasit Dioqezan të Sapës, ndërsa nga viti 2010 deri më 25 maj ushtroi detyrën e Delegatit të Caritasit Dioqezan si edhe atë të Vikarit të Përgjithshëm dhe Ekonomit të dioqezës.
Pas ndarjes nga jeta të ipeshkëvit Lucjan Avgustini, më 25 maj 2016, Dom Simon Kulli u zgjodh Administrator Dioqezan i Dioqezës së Sapës, duke e drejtuar komunitetin me përkushtim dhe qetësi deri në ditët e fundit.
Ndarja e tij e parakohshme nga jeta përbën një humbje të rëndë për Kishën Katolike në Shqipëri dhe për të gjithë besimtarët që e njohën si njeri të devotshëm, të urtë dhe të përkushtuar ndaj shërbesës.
