Policia e Tiranës goditi një tjetër rast të shpërndarjes së drogës, duke finalizuar operacionin antidrogë të koduar “Hallka e parë”. Gjatë aksionit u sekuestruan 2 kilogramë e 235 gramë lëndë narkotike të dyshuar kokainë, ndërsa u arrestuan në flagrancë dy kushërinj, Armand Nela, 34 vjeç dhe Saimir Nela 31 vjeç.
Operacioni u zhvillua pas informacioneve operative se dy shtetas po transportonin kokainë me qëllim furnizimin e personave dhe grupeve që më pas e ndanin atë në doza për shitje në zonat “Alliasi” dhe “Oxhaku” të kryeqytetit.
Policia identifikoi automjetin e dyshuar dhe e ndoqi atë deri te zona e quajtur “Treshi”, ku u bë ndalimi dhe kontrolli. Në bagazhin e mjetit u gjetën dy pako me gjithsej 2.235 kg kokainë, si dhe një pistoletë lodër.
Dy të arrestuarit akuzohen për veprën penale “Prodhimi dhe shitja e narkotikëve”. Hetimet vijojnë për identifikimin e personave të tjerë të përfshirë në këtë rrjet të furnizimit dhe shpërndarjes së drogës.
Materialet i janë referuar Prokurorisë së Tiranës për veprime të mëtejshme./vizionplus.
