Virginia Giuffre trondit botën: “U përdhunova nga një kryeministër i njohur” – kujtimet pas vdekjes zbulojnë detaje makabre

Virginia Giuffre trondit botën: “U përdhunova nga një kryeministër i njohur” – kujtimet pas vdekjes zbulojnë detaje makabre

Virginia Giuffre, një nga viktimat më të njohura të rrjetit të trafikut seksual të Jeffrey Epstein, ka shkruar në kujtimet e saj të botuara pas vdekjes se është përdhunuar brutalisht nga një “kryeministër i njohur”. Libri i saj “Nobody’s Girl” (“Vajza e askujt”), publikuar këtë javë, përmban rrëfime të rënda për abuzimet dhe frikën se do të vdiste si “skllave seksi”.

Rrëfimi tronditës i Giuffre

Në librin e publikuar gjashtë muaj pas vetëvrasjes së saj në Australi, Giuffre tregon se gjatë viteve që ishte nën kontrollin e Epstein dhe rrethit të tij, ajo u “huazua” për qindra njerëz të pasur e me ndikim.

> “U përdora dhe u poshtërova vazhdimisht – në disa raste u godita, u mbyta dhe u gjakosa,” shkruan ajo. “Besova se mund të vdisja si skllave seksi.”

Sipas CNN, në versionin amerikan të librit, Giuffre përmend se ishte përdhunuar nga një burrë që në dokumentet ligjore e kishte përshkruar si “një kryeministër të njohur”. Në versionin britanik, i njëjti person përmendet si “ish-ministër”. Nuk është e qartë pse ekziston kjo mospërputhje midis dy botimeve.

Giuffre thotë se ngjarja ndodhi në ishullin privat të Epstein në Karaibe, kur ajo ishte 18 vjeç.

> “Ai më mbyti disa herë derisa humba ndjenjat dhe kënaqej duke parë frikën time. Kryeministri qeshte kur më lëndonte dhe eksitohej më shumë kur i lutesha të ndalonte,” shkruan ajo.

Pas sulmit, ajo i ishte lutur Epstein të mos e dërgonte më tek ai, por ai kishte refuzuar, duke i thënë ftohtë: “Do ta marrësh këtë ndonjëherë.”

Skandali që përfshin edhe princin Andrew

Publikimi i kujtimeve pritet të rihapë skandalin që ka tronditur SHBA-në dhe Britaninë për lidhjet e njerëzve të fuqishëm me Epstein. Në qendër të vëmendjes është sërish princi Andrew, të cilin Giuffre e ka paditur duke pretenduar se ishte detyruar të kryente marrëdhënie seksuale me të kur ishte 17 vjeç.

Andrew, vëllai i mbretit Charles III, e ka mohuar gjithmonë këtë, por në vitin 2022 pranoi një marrëveshje gjyqësore për miliona dollarë.

Në libër, Giuffre pretendon gjithashtu se “ekipi i Andrew” kishte tentuar të punësonte “trolle online” për ta shqetësuar gjatë procesit gjyqësor. Ndërkohë, “Mail on Sunday” ka raportuar se në vitin 2011, princi kishte kërkuar nga një oficer policie të gjente informacione kompromentuese kundër saj – një çështje që tashmë po hetohet nga Policia Metropolitane e Londrës.

Një histori që s’e mbyll dot drejtësia

Giuffre ndërroi jetë në prill të këtij viti në Australi, në moshën 40-vjeçare. Botimi i librit të saj pas vdekjes ka rihapur një nga skandalet më të errëta të elitës politike dhe mbretërore, duke rikthyer në qendër të debatit pyetjen: sa njerëz të pushtetshëm mbetën të paprekur nga rrjeti i Epstein?