paTreshja e mandatuar nga Sali Berisha për përzgjedhjen e kandidatit të opozitës për Bashkinë e Tiranës, Flamur Noka, Belind Këlliçi dhe Ilir Alimehmeti, ka zhvilluar një tjetër raund takimesh këtë të diel me përfaqësues të partive aleate.
Këtë herë, përfaqësuesit e opozitës u takuan me Sekretarin e Përgjithshëm të Partisë së Lirisë, Tedi Blushi.
Në fokus të takimit ishte finalizimi i procesit të përzgjedhjes së kandidatit të përbashkët për garën në kryeqytet.
Pas takimit, deputeti Flamur Noka deklaroi se emri i kandidatit pritet të shpallet shumë shpejt.
“Ne jemi opozitë dhe forcë demokratike, ndaj ndjekim hapat dhe procedurat. Konsultohemi dhe më pas vendosim. E gjitha kjo është çështje ditësh dhe shumë shpejt do të keni emrin e kandidatit të opozitës për Bashkinë e Tiranës”, tha Noka.
Ai shtoi se i vetmi formacion që përjashtohet nga procesi është “e majta radikale e Arlind Qorrit”.
Nga ana tjetër, Tedi Blushi tha se kandidatura që do të mbështesë opozita do të jetë gjithëpërfshirëse dhe jo një emër i imponuar nga lart.
“Kandidatura e opozitës do të jetë gjithëpërfshirëse, jo një kandidaturë e emëruar sikundër ka ndodhur me kandidaten e Partisë Socialiste. Përballë ‘kandidates së COVID-it’, ne po zgjedhim ‘vaksinën’ e duhur, e cila do ta shërojë njëherë e përgjithmonë Tiranën”, u shpreh Blushi.
Takimi i sotëm vjen pas një raundi tjetër konsultimesh të zhvilluar të shtunën me krerët e partive aleate Fatmir Mediu (PR) dhe Agron Duka (PAA)./Panorama
