Tirana u trondit mbrëmjen e së enjtes pas ndeshjes Dinamo 1-1 Jagiellonia, e vlefshme për play-off e Conference League, ku tensionet mes tifozëve shqiptarë dhe atyre polakë degjeneruan në përplasje të dhunshme.
Polakët, të mbërritur në kryeqytet që pasditen e djeshme, nisën provokimet duke kryer gjeste të pahijshme ndaj bustit të Gjergj Kastriotit Skënderbeut në sheshin qendror të Tiranës. Pamjet e shpërndara në rrjet kanë shkaktuar zemërim të madh publik.
Përleshje dhe ndërhyrja e policisë
Pas ndeshjes, tifozët shqiptarë të Dinamos duket se i janë përgjigjur provokimeve. Në një video, ata shihen duke u përleshur me një tifoz polak që kishte bërë gjeste fyese. Policia ndërhyri me forca të shumta për të shpërndarë turmat dhe për të shmangur eskalimin e dhunës.
Edhe pse tifozët e Jagiellonias u shoqëruan me autobusa drejt aeroportit, incidentet nuk munguan as rrugës për në Rinas, ku shqiptarë të revoltuar sulmuan me flakadanë autobusët polakë. Tensionet lidhen edhe me thirrjet e tyre “Vritini shqiptarët” si dhe me pankartat e shfaqura shpesh në stadium, “Kosova është Serbi”.
Arrestohen vetëm shqiptarët
Kulmi i revoltës ishte përdhosja e bustit të Skënderbeut në mes të ditës, megjithatë policia shqiptare deri tani ka arrestuar vetëm tifozë shqiptarë.
Në njoftimin zyrtar, policia bëri me dije se ka vënë në pranga 3 shtetas shqiptarë (A. M., 32 vjeç, K. S., 29 vjeç dhe Sh. S., 30 vjeç) si dhe ka proceduar në gjendje të lirë 2 të mitur 17-vjeçarë. Ata akuzohen për pengim të qarkullimit dhe goditje me sende të forta ndaj 3 autobusëve që transportonin tifozët polakë.
Ndërkohë, asnjë prej huliganëve polakë që përdhosën bustin e Heroit Kombëtar nuk është identifikuar apo arrestuar nga policia.
