Policia e kryeqytetit ka vënë në pranga dy persona, si autorë të dyshuar të ngjarjes së rëndë të ndodhur të premten në zonën e Kombinatit, ku u raportua për të shtëna me armë zjarri mes dy automjeteve në lëvizje.
Të arrestuarit janë:
- Oltjon Asllani (i njohur edhe si Vodollari), 28 vjeç
- Serxho Bajza, 30 vjeç
Si ndodhi ngjarja
Nga hetimet paraprake dhe pamjet filmike të siguruara, rezulton se Asllani është autori kryesor, i cili ka nxjerrë një armë automatike kallashnikov nga xhami i makinës dhe ka qëlluar disa herë drejt një automjeti tjetër në një kryqëzim të zonës së Kombinatit.
Automjeti i shënjestruar, në të cilin ndodheshin shtetasit R. K., 38 vjeç, dhe Zh. K., u largua me shpejtësi, ndërsa në vendngjarje u gjetën gëzhoja të shumta.
Serxho Bajza ishte drejtues i mjetit që përdorte Asllani dhe shërbente si bashkëpunëtor i tij gjatë ngjarjes.
Motivet dhe përplasja mes grupeve
Sipas Policisë, konflikti nisi për motive të dobëta mes dy grupeve dhe më pas degjeneroi në përdorimin e armës. Fatmirësisht, nga të shtënat nuk pati të plagosur, vetëm dëme materiale.
Në vijim të hetimeve, janë proceduar penalisht edhe shtetasit R. K., Zh. K., F. K. dhe B. M., të cilët dyshohet se ishin të përfshirë në konfliktin paraprak me autorët.
Hetimet e mëtejshme
Policia ka sekuestruar automjetin e përdorur nga autorët dhe vijon kërkimet për armën e zjarrit të tipit kallashnikov. Materialet procedurale i janë referuar Prokurorisë së Tiranës për veprime të mëtejshme ligjore.
