Cape Town, Afrikë e Jugut — Michelle Sky Hayward, kampione në sportin e kite-surfingut dhe influencuese e ndjekur gjerësisht në rrjetet sociale, ndau kohët e fundit një video ku shihet duke notuar mes shkumës të detit në një plazh të njohur të qytetit. Por gëzimi i saj u kthye në shqetësim, pasi ndjekësit zbuluan se uji mund të ishte i ndotur nga ujërat e zeza.
Videoja u publikua nga vetë Michelle, e cila është edhe ambasadore e markës GoPro dhe nënë, me përshkrimin e një dite të bukur në natyrë. Megjithatë, mijëra komente paralajmëruese e informuan se shkuma që e rrethonte mund të mos ishte thjesht fenomen natyror, por pasojë e ndotjes urbane.
“Kam bërë një gabim të tmerrshëm,” shkroi ajo më vonë, duke pranuar se nuk e kishte ditur çfarë e priste në ato ujëra.
Ngjarja ka ngjallur diskutime mbi cilësinë e ujërave në zonat bregdetare të Afrikës së Jugut dhe transparencën institucionale për informimin publik rreth ndotjes. Autoritetet lokale ende nuk kanë komentuar zyrtarisht mbi incidentin.
