Jennifer Lopez po përjeton një rikthim të fuqishëm në skenë, duke dëshmuar se mosha është thjesht një numër.
Në natën e gjashtë të turneut të saj Up All Night në Spanjë, këngëtarja 55-vjeçare elektrizoi audiencën madrilene me një kostum të hollë të stolisur me kristale, i cili theksonte linjat e saj të tonifikuara dhe energjinë e pashtershme që e karakterizon.
Me çizmet vezulluese që i ngjiteshin deri në kofshë dhe geta rrjetë, J.Lo dhuroi një performancë plot jetë, stil dhe dinamizëm, duke ndezur atmosferën mes duartrokitjeve të zjarrta të publikut, shkruan DailyMail.
Veshja e saj magjepsëse, që i ekspozonte bukur format trupore, e shoqëroi gjatë gjithë mbrëmjes ndërsa këndonte dhe kërcehte në skenën e Madridit.
Turneu Up All Night shënon rikthimin e parë të Lopez në skenë pas një pauze gjashtëvjeçare, që prej turneut It’s My Party në vitin 2019.
Turneu nisi më 8 korrik në Pontevedra dhe do të zgjasë deri më 12 gusht, kur do të përmbyllet në Sardenjë të Italisë. Pas përfundimit të pjesës evropiane, J.Lo pritet të zhvendoset në Las Vegas për një mini-rezidencë në Caesars Palace në fund të dhjetorit.
Ky rikthim vjen në një periudhë të ndjeshme për artistën, e cila ka qenë në qendër të medias muajt e fundit për raportin e saj me Ben Affleck. Në një event privat në Los Angeles, ku prezantoi këngë të reja për një grup të vogël fansash, Lopez aludoi për përjetimet personale përmes baladës “Wreckage Of You”, duke theksuar forcën që ka gjetur “mes rrënojave”.
Pas anulimit të turneut të mëparshëm për t’i kushtuar më shumë kohë familjes, ky rikthim në skenë duket si një kapitull i ri për Jennifer Lopez — më e vendosur se kurrë për të ndriçuar.
