Nga Rianna Croxford dhe Larissa Kennelly – BBC News Investigations
Përmbajtje eksplicite – lexuesit të tregojnë kujdes
“Ejani ta rregulloni këtë kënd, nuk duket luksoz,” – dëgjohet reperi Sean “Diddy” Combs (njohur më herët si Puff Daddy dhe P. Diddy) në një mesazh zanor që u dërgon asistentëve të tij personalë, me muzikë R&B në sfond. Orë më parë, një tjetër “freak-off” – orgji e dehur me drogë, e njohur ndryshe si “Wild King Night” – kishte përfunduar, dhe stafi thirrej për pastrim urgjent.
Termi “freak-offs” është një zhargon që u përdor nga stafi i Diddy-t për të përshkruar orgji ekstreme dhe të çrregullta seksuale, shpesh të shoqëruara me: përdorim të drogës (si kokainë, ketaminë, kërpudha, etj.), akte të shumta seksuale me partnerë të ndryshëm (burra dhe gra), lojëra apo situata poshtëruese, të ashtuquajtura “teste besnikërie”, filmime seksuale, shpesh të fshehta dhe një ambient i krijuar me ndriçim të kuq, vajra lubrifikantë, muzikë dhe alkool
Ishte një mënyrë si i referoheshin këtyre eventeve të organizuara, zakonisht në vilat, hotelet apo jahtet private të Diddy-t. Prokurorët dhe ish-stafi i përshkruan si “evente të organizuara për përfitim seksual dhe kontroll mbi të ftuarit”.
Në dokumente ligjore, këto “freak-offs” përbëjnë një pjesë qendrore të akuzave për trafikim njerëzor dhe abuzim seksual.
BBC ka siguruar mesazhe, regjistrime zanore dhe dëshmi nga ish-punonjës të shtëpive të Combs, që përshkruajnë një realitet tronditës pas fasadës glamuroze të vilave të tij në Miami, Beverly Hills dhe Hamptons. Këto përvoja mbulojnë 5-10 vitet e fundit – periudhë që u hetua edhe në procesin penal ndaj Combs në Nju Jork.
“Zotëri i errësirës” dhe “testet e besnikërisë”
Stafi flet për një shef të frikshëm, të paparashikueshëm, që shpesh luante lojëra mendore me vartësit dhe organizonte “freak-offs” të çmendura në vila, jahte e hotele ndërkombëtare. Ai udhëtonte gjithmonë me një çantë Gucci të mbushur me droga të forta, vaj bebeje, lubrifikantë dhe llamba të kuqe – “atmosfera e preferuar e Diddy-t”.
Një ish-asistent, Ethan (emër i ndryshuar), rrëfen sesi u godit në fytyrë nga copa xhami pasi Combs theu një gotë në nervozizëm. Një tjetër, Phil Pines, tregon sesi Diddy e urdhëroi të zbriste në det për të gjetur një unazë të hedhur – një “test besnikërie”. Në një rast tjetër, ai thjesht e thirri pas mesnate për t’i marrë telekomandën nën shtrat.
“Freak-off”-et dhe seksi i detyruar
Sipas dëshmive, Combs kërkonte që për “netët e egra” të përgatitej një listë me: baby oil, Astroglide, kafe me vanilje dhe drogë. Policia gjeti mbi 1,000 shishe vaj në shtëpinë e tij. Shpesh, të ftuarit ishin shumë të rinj dhe sipas Pines, disa dukeshin “të tronditur”, madje një vajzë iu lut të mos e linte vetëm. Të nesërmen, një infermiere vinte me serum për t’i ndihmuar pas 24 orësh pa ngrënë, në ekstazë droge.
Pines kujton një episod të frikshëm ku Combs e shtyu drejt një gruaje gjysmë të pavetëdijshme, i dha një prezervativ dhe i kërkoi të kryente marrëdhënie seksuale për të “provuar besnikërinë”. Pines thotë se u ndje i detyruar dhe manipulimi ishte i hapur.
Regjistrime zanore, video intime dhe fshirje provash
Ish-stafi përshkruan një skemë ku ata detyroheshin të pastronin çdo gjurmë të “freak-offs”, përfshirë pastrimin e lëngjeve trupore, drogës dhe fshirjen e videove komprometuese nga telefonat e Combs.
Në një rast, Pines thotë se dëshmoi Combs duke e shtyrë dhe sharë një grua, duke i kërkuar xhupin – që ajo ia dha lakuriq. Brenda një jave, ajo ishte sërish në vilë, me darka, dhurata dhe “falje”.
Çanta me drogë në avionin privat dhe incidenti në Venecia
Duke udhëtuar me avionin e tij privat, Combs mbante gjithmonë një çantë të vogël me kërpudha halucinogjene, ekstazi, ketaminë dhe lubrifikantë. Në Venecia, stafi u ndalua nga autoritetet italiane dhe Pines mendonte se do të “merrte përsipër fajin”.
Një tjetër asistent, Brendan Paul, u arrestua për drogë në mars 2024, por akuzat u rrëzuan pasi mori pjesë në një program rikuperimi. Në gjyq, ai pranoi se mbante kokainë të Combs “nga besnikëria”.
Nga heshtja te paditë dhe frika
Të frikësuar për jetët dhe karrierën e tyre, shumë nga ish-stafi kanë heshtur për vite. Por pas padi civile të Cassie Ventura në nëntor 2023 – e cila u zgjidh me një pagesë 20 milionë dollarëshe – më shumë zëra kanë nisur të dalin. Deri tani, janë më shumë se 60 padi civile ndaj Diddy-t, shumica ende në pritje të shqyrtimit.
“Unë ia njoh meritën Cassie Ventura-s që pati guximin të flasë. Ajo hapi derën për ne të tjerët,” – thotë Pines.
Çfarë pritet më tej?
Combs është deklaruar i pafajshëm për akuzat e ngarkuara dhe avokatët e tij mohojnë çdo pretendim për trafik seksual apo abuzim. Ai pritet të dënohet në tetor 2025 për dy akuza që lidhen me transport për qëllime prostitucioni. Ndërkohë, hetimet federale dhe çështjet civile vazhdojnë.
