Kryeministri i Shqipërisë, Edi Rama, ka reaguar ashpër ndaj deklaratës së politikanit britanik Nigel Farage, i cili pretendoi se “1 në 50 shqiptarë në Britani janë në burg”, duke e cilësuar këtë si një tjetër gënjeshtër nga manuali i politikës së post-Brexit-it.
Përmes një reagimi në platformën X, Rama e ironizoi Farage-in, duke e përshëndetur me një ton thumbues:
“Çfarë nderi – për një ‘gjigand’ siç më përshkroi ai (nga një ‘vend i vogël’, natyrisht) – të tërheq vëmendjen e mjeshtrit të padiskutueshëm të politikës titujsh në Britani.”
Kryeministri theksoi se pretendimi i Farage për “1 në 50 shqiptarë në burg” nuk qëndron dhe është “një absurditet i denjë për gazetat tabloid”.
“Nëse analizohen realisht shifrat – edhe duke supozuar se çdo shqiptar në burg është fajtor – përqindja e kriminalitetit në mesin e shqiptarëve në Mbretërinë e Bashkuar është po aq e ulët, në mos më e ulët, se ajo në popullatën britanike.”
Në një sfidë të drejtpërdrejtë për Farage-in, Rama i ofroi një zgjidhje që përzien ironi, diplomaci dhe faktet:
“Nëse shifra jote ‘1 në 50’ del e saktë, unë angazhohem personalisht t’i marr të gjithë mbrapsht. Por nëse është vetëm një ‘fakt’ tabloidësh, atëherë ti do të vish në Shqipëri, si i ftuar nderi.”
Ai ftoi Farage-in të vizitojë vendin, të njohë mikpritjen shqiptare dhe të angazhohet publikisht që, në të ardhmen, kur dikush shpif për shqiptarët, ai të jetë i pari që i del për zot të vërtetës.
“Një verifikim faktesh për një dëbim total – ose një pushim total, me disa nga njerëzit më të ngrohtë që do të njohësh ndonjëherë,” përfundoi Rama, me një ftesë që tejkalon debatin dhe fton në dialog civilizues.
