Nga aeroporti i Milanos, Drejtuesi Politik i Partisë Socialiste për Diasporën, Taulant Balla, ka ndarë një moment të veçantë me ndjekësit e tij në rrjetet sociale, duke prezantuar Marjanën, një vajzë shkodrane që jeton prej 12 vitesh në Itali, por që ruan lidhjet e forta me vendlindjen dhe dëshiron të kthehet një ditë.
“Ju përshëndes të gjithëve me Marjanën nga Milano, e cila prej 12 vitesh jeton këtu. Por që bashkë me vëllezërit dhe motrat në Berlin e Londër, nuk i harrojnë kurrë prindërit në Shkodër. Dy herë në vit vijnë për pushime në Velipojë, Razëm, Tiranë – dhe këtë vit do të shkojnë edhe në jug,” shprehet Balla në video.
Ai theksoi rëndësinë e rikthimit të të rinjve në atdhe, duke përmendur se tashmë edhe në Shqipëri po krijohen mundësi të reja për punësim dinjitoz.
“I pëlqeu shumë ftesa për t’u kthyer në Shqipëri, ndoshta në të njëjtin pozicion pune. Sepse e vërteta është që edhe në Shqipëri pagat po bëhen konkurruese. Ndoshta jo si në Milano, por kostoja e jetesës është më e ulët në Tiranë, apo jo? – ‘Patjetër,’ – tha Marjana.”
Balla e përshëndeti përzemërsisht Marjanën për përpjekjet dhe arritjet e saj personale në emigracion, duke e konsideruar një shembull frymëzues për të rinjtë shqiptarë që janë larguar nga vendi, por që mbeten të lidhur me rrënjët.
“Të falënderojmë për gjithçka bën si shkodrane që ka çarë vetë rrugët e jetës. I përshëndes edhe prindërit e tu në Shkodër, sepse e vërteta është që tani që do të kthehesh, do ta gjesh Shkodrën më të bukur se kurrë. Ndryshimi i Shkodrës sapo ka filluar,” tha Balla.
