Kryeministri Edi Rama ndodhet në Emiratet e Bashkuara Arabe për të marrë pjesë në Javën e Qëndrueshmërisë së Abu Dhabit 2025 (Abu Dhabi Sustainability Week). Në këtë ngjarje, ai iu adresua Samitit global, ku morën pjesë krerë të shteteve dhe liderë botërorë, politikëbërës të lartë dhe specialistë të industrisë. Gjatë fjalës së tij, Kryeministri informoi për një marrëveshje strategjike mes Shqipërisë, Italisë dhe Emirateve të Bashkuara Arabe.
Kjo marrëveshje ka për qëllim ndërtimin e kabllove nënujore, të cilat do të përdoren si një instrument i rëndësishëm për transmetimin e energjisë së ripërtëritshme nga Shqipëria në Itali. Rama theksoi se kjo marrëveshje do të rrisë kapacitetin e Shqipërisë si një lojtar kyç në rajon, mbështetur në prodhimin e saj 100% me energji të ripërtëritshme.
Në fjalimin e tij, Kryeministri Rama shprehu mirënjohjen e tij për Lartësinë e tij Sheikh Mohammed bin Zayed për mbështetjen dhe frymëzimin e tij. Ai gjithashtu theksoi se prodhimi i energjisë elektrike në Shqipëri është 100% nga burime të ripërtëritshme dhe përqindja e energjisë së ripërtëritshme në kërkesën fundore për energji është 44%, duke e vendosur Shqipërinë në krye të listës së vendeve europiane për këtë tregues.
Rama informoi gjithashtu se kjo marrëveshje strategjike me Italinë dhe Emiratet e Bashkuara Arabe do të nënshkruhet së shpejti. Ai theksoi rëndësinë e këtij bashkëpunimi për rajonin dhe Evropën, duke vlerësuar kontributin e Emirateve të Bashkuara Arabe dhe të Dr. Sultan Ahmed Al Jaber për zhvillimin e sektorit energjetik shqiptar.
Kryeministri vuri në dukje rëndësinë e partneritetit të Shqipërisë me Emiratet e Bashkuara Arabe në sektorin energjetik dhe rolin kyç të këtij partneriteti në forcimin e paqes dhe bashkëpunimit në rajon. Bashkëpunimi midis kompanisë shtetërore të energjisë (KESH) në Shqipëri dhe Masdar-it synon të zhvillojë deri në 3 gigavat prodhim të energjisë së ripërtëritshme.
Në përfundim të fjalimit, Kryeministri Rama shprehu mirënjohjen e tij për kryeministren e Italisë, Giorgia Meloni, e cila mori pjesë në Samit dhe mbështeti marrëveshjen strategjike mes Italisë, Emirateve të Bashkuara Arabe dhe Shqipërisë.
Kryeministrja e Italisë, Giorgia Meloni, gjithashtu mbajti një fjalim, ku vlerësoi bashkëpunimin dhe rëndësinë e projekteve energjetike në rajon. Ajo theksoi lidhjen tradicionale të Italisë me Ballkanin Perëndimor dhe rëndësinë e ndërlidhjes energjetike midis vendeve të rajonit. Meloni shprehu krenarinë e saj për këtë nismë dhe nënvizoi rëndësinë e bashkëpunimit ndërmjet tre qeverive dhe sektorëve privatë për zhvillimin e projekteve energjetike. Ajo përfundoi fjalimin duke theksuar se ky projekt është një hap konkret drejt një ndërlidhjeje globale që do të sjellë përfitime të ndërsjellta për të gjithë rajonin.
