Tre persona u vranë dhe 14 të tjerë u plagosën në një sulm me armë në selinë e kompanisë turke të aviacionit (TUSAS) pranë Ankarasë, njoftoi kryetari i bashkisë së provincës Kahramankazan, Selim Cirpanogly për kanalin televiziv turk Tele1.
Ministri i Brendshëm turk Ali Yerlikaya tha në rrjetin social X se “një sulm terorrist u krye ndaj objekteve të TUSAS në Kahramankazan, Ankara. Fatkeqësisht kemi të vdekur dhe të lënduar”.
Autoritetet ende nuk kanë dhënë hollësi mbi motivet dhe autorët e sulmit, por disa media pretendojnë se ky është një sulm vetëvrasës.
TUSAS është një nga kompanitë më të rëndësishme të mbrojtjes dhe aviacionit të Turqisë. Ajo është prodhuesja e avionit të parë luftarak të Turqisë ‘KAAN’, krahas prodhimeve të tjera.
Pas sulmit të përgjakshëm reagoi edhe kreu i NATO-s Mark Rutte, i cili në një postim në median sociale X shkruante se aleanca ushtarake mbështet aleatin e saj, Turqinë.
“Njoftimet për të vdekur dhe të plagosur në Ankara janë thellësisht shqetësuese. NATO qëndron krah aleatit të saj, Turqisë. Ne dënojmë fuqishëm terrorizmin në të gjitha format e tij dhe po monitorojmë nga afër zhvillimet“, shkruante
Sipas lajmeve të fundit, shpërthime dhe të shtëna armësh u dëgjuan para objektit TAI në rrethin Kahramankazan të Ankarasë. Në deklaratën e tij të parë, ministri i Punëve të Brendshme Ali Yerlikaya tha se sulmi ishte një sulm terrorist dhe se kishte dëshmorë dhe të plagosur. Informacioni i parë i marrë nga Përfaqësuesja e CNN TÜRK në Ankara, Dicle Canova është se terroristët që erdhën në portën e sigurisë së objektit të TAI-t shpërthyen automjetin dhe u futën në një konflikt të armatosur. Në vendngjarje janë nisur menjëherë forcat e sigurisë, ekipet mjekësore dhe zjarrfikëset.
