Drejtori i Përgjithshëm i Policisë së Shtetit, Ilir Proda, njoftoi shkarkimin nga detyra të Drejtorit të Drejtorisë Vendore të Policisë Shkodër dhe Shefit të Komisariatit të Policisë Shkodër, për shkak të mosveprimit dhe mungesës së kontrollit ndaj ndërtimeve pa leje në zonën e mbrojtur të Thethit.
Ky vendim erdhi pas konstatimit të ndërtimeve të paligjshme në qendër të Thethit, ku është urdhëruar edhe një hetim disiplinor i thelluar. Si pjesë e këtij procesi, është pezulluar shefi i Stacionit të Policisë Theth, ndërsa janë nisur procedurat disiplinore ndaj inspektorit të zonës dhe specialistit të krimeve, të cilët gjithashtu do të largohen nga Policia e Shtetit.
Drejtori Proda theksoi se përgjegjësia nuk i përket vetëm funksionarëve lokalë, por edhe Drejtorisë së Qarkut Shkodër, e cila nuk ka ushtruar kontrollin e duhur mbi territorin.
Ky veprim tregon vendosmërinë e Policisë së Shtetit për të goditur çdo paligjshmëri dhe për të garantuar mbrojtjen e mjedisit dhe interesit publik në zonat e mbrojtura.
