Qeveria e Italisë i ka dhënë nënshtetësinë italiane presidentit të Argjentinës, Javier Milei, për shkak të rrënjëve të tij familjare, duke shkaktuar zemërim në mesin e politikanëve të opozitës, të cilët kundërshtuan trajtimin e tij me atë të fëmijëve të lindur në Itali nga prindër emigrantë.
Milei ndodhet në Romë për të takuar kryeministren italiane, Giorgia Meloni , dhe për të marrë pjesë në festivalin vjetor të partisë së saj Fratelli d’Italia të shtunën.
Lajmi i raportuar nga mediat italiane shkaktoi një reagim të zemëruar nga disa politikanë dhe në rrjetet sociale nga njerëzit që protestonin për dhënien e shtetësisë Milei-t kur është e vështirë të merret për fëmijët e lindur në Itali nga prindër emigrantë.
Ligjet e shtetësisë italiane bazohen në lidhjet e gjakut, që do të thotë se edhe pasardhësit e largët të një shtetasi italian mund të marrin një pasaportë italiane. Kërkesat për të huajt e lindur në Itali ose që migrojnë atje, nga ana tjetër, janë shumë më të ashpra. Grupet pro-migrante kanë propozuar një referendum për lehtësimin e tyre, por koalicioni i djathtë i Melonit është kundër çdo lehtësimi.
Riccardo Magi, një ligjvënës nga partia e vogël opozitare +Europa, tha se dhënia e shtetësisë Milei-t ishte një akt i “diskriminimit të patolerueshëm ndaj kaq shumë të rinjve që do ta marrin atë vetëm pas shumë vitesh”.
Gjatë një udhëtimi të mëparshëm në Itali në shkurt, Milei tha në një intervistë televizive se ndihej “75% italian” pasi tre nga gjyshërit e tij kishin origjinë italiane dhe se ai ka “një pasion të jashtëzakonshëm për operën italiane”.
Libertariani Milei dhe konservatorja Meloni kanë krijuar një marrëdhënie të ngushtë. Kur ata u takuan në Buenos Aires muajin e kaluar, lideri argjentinas i dha mysafires së tij italiane një statujë të vetes duke përdorur sharrë elektrike me zinxhir./balkanweb
