Kreu i Grupit Parlamentar të Partisë Demokratike, Gazment Bardhi, ka akuzuar qeverinë dhe Kuvendin për situatën e krijuar me pagat e magjistratëve, duke deklaruar se moszbatimi i vendimit të Gjykatës Kushtetuese po cenon pavarësinë e drejtësisë.
Pas mbledhjes së Konferencës së Kryetarëve, Bardhi deklaroi se magjistratët prej disa ditësh, sipas tij, nuk kanë bazën ligjore për të marrë pagat.
“Është fakt që sistemi i drejtësisë është futur në kolaps për shkak të papërgjegjshmërisë së qeverisë dhe mosveprimit të Kuvendit për të zbatuar një vendim të Gjykatës Kushtetuese”, tha Bardhi.
Kreu i grupit parlamentar të PD-së kundërshtoi edhe qëndrimet e kryeministrit për mënyrën se si duhet të zgjidhet çështja. Sipas tij, Këshilli i Ministrave nuk ka përmbushur detyrimin për të propozuar projektligjin për pagat e magjistratëve.
Bardhi argumentoi se çështjet që prekin buxhetin e shtetit dhe financimin e një pushteti tjetër nuk duhet të zgjidhen përmes nismave individuale të deputetëve.
Në këtë kontekst, ai sulmoi projektligjin e paraqitur nga dy deputetë socialistë, duke pretenduar se nisma bie ndesh me vendimin e Gjykatës Kushtetuese.
“Ligji i propozuar nga dy deputetë socialistë është në kundërshtim me vendimin e Kushtetueses”, deklaroi Bardhi, duke kërkuar bashkëveprim mes Këshillit të Ministrave dhe Kuvendit për zbatimin e vendimit.
Sipas tij, pasojat kanë nisur të ndihen edhe në funksionimin e gjykatave. Bardhi pretendoi se në një prej gjykatave të vendit administrata nuk po ofron shërbime për qytetarët për shkak të situatës së krijuar.
