Kreu i Partisë Demokratike, Sali Berisha, ka ashpërsuar tonet në deklaratën e tij pas protestës, duke hedhur akuza të drejtpërdrejta ndaj qeverisë dhe strukturave të policisë.
Berisha deklaroi se drejtues të lartë të PD janë shënjestruar dhe goditur gjatë përplasjeve, duke përmendur me emër Luçiano Boçin, Flamur Nokën dhe Klevis Balliun, të cilët sipas tij kanë mbetur të lënduar.
Në fjalën e tij, ai përdori edhe tone të forta ndaj zyrtarëve të policisë dhe qeverisë, duke përmendur “Sokol tradhtarin” dhe duke akuzuar se, me urdhër të Edi Rama dhe Belinda Ballukut, është ushtruar dhunë ndaj protestuesve.
Sipas Berishës, “Skënder Balluku shënjestroi dhe goditi drejtuesit kryesorë të PD”, ndërsa shtoi se gjatë ndërhyrjes janë përdorur edhe mjete si granata zhurmuese.
Ai theksoi se “dosja Rama-Balluku nuk do të mbyllet kurrë”, duke paralajmëruar se protestat do të vijojnë dhe se opozita do të bashkohet në një front të përbashkët kundër qeverisë.
Në fund, Berisha falënderoi mbështetësit për qëndresën, duke e cilësuar protestën si një “kryengritje paqësore” që nuk do të ndalet.
