Partia Demokratike ka kërkuar dorëheqjen e menjëhershme të kryeministrit Edi Rama, krijimin e një qeverie kujdestare dhe shpërndarjen e Parlamentit, për t’i hapur rrugë zgjedhjeve të parakohshme. Kërkesat u paraqitën në Kuvend nga deputeti Belind Këlliçi, në emër të grupit parlamentar demokrat dhe aleatëve të opozitës.

Në ditën e dhjetë të protestave në Shqipëri, Këlliçi deklaroi se opozita mbështet kërkesat e studentëve dhe të qytetarëve që protestojnë kundër qeverisë.

Sipas tij, vendi po përjeton lëvizjen më të fuqishme studentore të 35 viteve të fundit, të cilën e cilësoi si reagim ndaj keqqeverisjes, korrupsionit dhe mënyrës së ushtrimit të pushtetit.

“Kjo lëvizje nuk është thjesht një protestë kundër një qeverie. Është një revoltë kundër një modeli të krijuar nga Edi Rama”, deklaroi Këlliçi.

Dy kërkesat e opozitës

Në deklaratën e lexuar në Parlament, grupi parlamentar i PD-së paraqiti dy kërkesa kryesore.

E para është dorëheqja e qeverisë Rama dhe krijimi i një qeverie kujdestare, me detyrën për të përgatitur zgjedhje të parakohshme, të lira dhe të ndershme.

Kërkesa e dytë është vetëshpërndarja e Parlamentit aktual, të cilin opozita e konsideron të paaftë për të përfaqësuar normalisht vullnetin e qytetarëve në kushtet e krizës politike.

Këlliçi argumentoi se institucionet nuk mund të vijojnë punën sikur nuk po ndodh asgjë, ndërkohë që protestat vazhdojnë dhe në disa institucione arsimore raportohet bojkot i mësimit.

“Nuk mund të ketë normalitet parlamentar përballë një krize të thellë politike dhe shoqërore”, tha deputeti demokrat.

Këlliçi akuzon qeverinë për dhunë ndaj protestuesve

Gjatë fjalës së tij, Këlliçi akuzoi kryeministrin dhe policinë për përdorim dhune ndaj studentëve, duke pretenduar se disa protestues kanë pësuar fraktura dhe dëmtime të rënda.

Ai denoncoi gjithashtu presionin që, sipas tij, ushtrohet ndaj prindërve të nxënësve dhe studentëve pjesëmarrës në protesta.

Këto janë akuza të ngritura nga opozita në deklaratën e saj politike.

“Studentët në rrugë, deputetët e opozitës në krah të tyre”, theksoi Këlliçi, duke deklaruar se PD do të mbështesë kërkesat për ndryshim politik.

Deklarata u bë gjatë seancës plenare të 22 tetorit, e cila u shoqërua me tensione dhe bllokim të foltores nga deputetët e opozitës.