Sipas njoftimit zyrtar, gjatë ditës së diel në Spitalin Universitar të Traumës kanë marrë shërbim mjekësor 23 persona të lënduar.
Mes tyre janë 17 efektivë policie, një protestues i mitur, një përfaqësuese e medias dhe katër kalimtarë.
Ministria bën të ditur se një efektiv policie vijon të marrë trajtim në urgjencën e Spitalit të Traumës, ndërsa përfaqësuesja e medias është shtruar për ekzaminime të mëtejshme. Gjendja e saj shëndetësore paraqitet e mirë.
Ndërkohë, në Qendrën Spitalore Universitare “Nënë Tereza” janë paraqitur pesë persona të tjerë të lënduar: dy efektivë policie dhe tre protestues.
Nga këta, vetëm një efektiv vijon të marrë trajtim në urgjencë, ndërsa katër personat e tjerë janë larguar pas marrjes së ndihmës dhe këshillës mjekësore.
14 persona vijojnë të marrin mjekim që prej nisjes së protestave
Ministria e Shëndetësisë ka publikuar edhe një bilanc për periudhën nga 13 tetori, kur nisën protestat.
Sipas këtij përditësimi, numri i personave të shtruar në spital dhe që vijojnë të marrin mjekim ka arritur në 14.
Mes tyre janë pesë efektivë policie, katër protestues, katër kalimtarë dhe një përfaqësuese e medias.
Ky është një bilanc i veçantë i personave që vijojnë trajtimin nga data 13 tetor dhe nuk duhet t’i shtohet numrit të 28 të lënduarve të raportuar për ditën e sotme.
Ministria e Shëndetësisë falënderoi mjekët, infermierët dhe ekipet shëndetësore për kujdesin e ofruar ndaj të lënduarve, duke theksuar angazhimin për garantimin e shërbimit mjekësor për çdo qytetar, pa dallim.
