Princi George ka nisur një kapitull të ri larg shtëpisë. Djali 13-vjeçar i Princit William dhe Kate Middleton do të kalojë pesë vitet e ardhshme në Eton College, një prej shkollave më prestigjioze dhe më të shtrenjta në Britaninë e Madhe.
George ndjek kështu gjurmët e babait të tij, William, dhe xhaxhait, Princit Harry, të cilët kanë studiuar më parë në Eton.
Jeta që e pret princin e ri është e mbushur me tradita shekullore dhe rregulla të pazakonta. Tarifa vjetore e shkollës arrin në 65,673 paund, ndërsa nxënësit jetojnë në një nga 25 konviktet e Etonit.
Çdo djalë ka dhomën e tij private, me krevat, tavolinë dhe rafte. Sipas traditës së shkollës, nxënësit kanë edhe një “boys maid”, një punonjëse që kujdeset ndër të tjera për rregullimin e dhomës çdo mëngjes.
George do të ketë gjithashtu një nxënës më të madh të quajtur “uncle”, që do ta ndihmojë të përshtatet me jetën e re, si dhe një “timelord”, i cili e ndihmon të menaxhojë orarin e ngjeshur.
Por veçantitë nuk mbarojnë këtu. Eton ka edhe pub-in e vet, të quajtur “Tap”, ku nxënësit nga mosha 16 vjeç mund të porosisin deri në dy gota birrë ose cider, tri herë në javë.
Edhe ndëshkimet ruajnë traditën e vjetër. Shkelja e rregullave mund t’i çojë nxënësit në “The Bill”, ndërsa masat përfshijnë kopjimin e 100 vargjeve të poezisë latine. Për shkelje të tjera mund të duhet të kopjojnë 500 vargje ose të kryejnë punë, si pastrimi i barërave në kopshtin e drejtuesit të konviktit.
Uniforma karakteristike, termat e veçantë dhe ritualet janë pjesë e përditshmërisë. Mësuesit quhen “beaks”, provimet “trials”, ndërsa mësimet “divs”.
Princi George pritet të qëndrojë në Eton gjatë javës, por shkolla ndodhet vetëm rreth 10 minuta larg shtëpisë së familjes në Windsor, duke i dhënë mundësinë të kthehet pranë prindërve në fundjavë.
Eton ka nxjerrë ndër vite një numër të madh figurash të njohura britanike, përfshirë 20 kryeministra, si Boris Johnson dhe David Cameron, si dhe shkrimtarin George Orwell dhe autorin e James Bond, Ian Fleming.
