Numërimi i votave për kandidatët për deputetë në Kosovë po nxjerr në pah diferenca të mëdha mes figurave kryesore politike. Sipas të dhënave të publikuara nga Komisioni Qendror i Zgjedhjeve, pas procesimit të 62.09% të votave, lideri i Lëvizjes Vetëvendosje, Albin Kurti, kryeson bindshëm listën e kandidatëve më të votuar.
Kurti ka siguruar deri tani 147.433 vota, duke lënë pas me diferencë të konsiderueshme rivalët e tij politikë. Në vendin e dytë renditet kandidati i Partisë Demokratike të Kosovës, Bedri Hamza, me 73.035 vota.
Ndërkohë, presidentja aktuale e Kosovës dhe bartësja e listës së Lidhjes Demokratike të Kosovës, Vjosa Osmani, numëron 48.135 vota, duke u renditur e treta në këtë fazë të procesit.
Rezultatet paraprake tregojnë një avantazh të qartë të Kurtit edhe në votën personale, duke konfirmuar mbështetjen e fortë elektorale për liderin e Vetëvendosjes pas zgjedhjeve të parakohshme parlamentare.
Në vendin e katërt renditet kreu i Aleancës për Ardhmërinë e Kosovës, Ardian Gjini, i cili deri më tani ka marrë 24.857 vota.
Procesi i numërimit vijon në të gjithë Kosovën, ndërsa pritet që rezultati përfundimtar të përcaktojë jo vetëm përbërjen e Kuvendit, por edhe peshën politike që do të kenë figurat kryesore në negociatat për formimin e institucioneve të reja.
