Një monitor elektronik për kyçin e këmbës, një makinë prerëse mishi, qumësht gjiri dhe një pako me flutura të gjalla janë vetëm disa nga sendet më të pazakonta që pasagjerët kanë harruar në automjetet e Uber gjatë vitit të fundit.
Kompania publikoi Indeksin Vjetor të Objekteve të Humbura, i cili këtë vit shënon 10-vjetorin e tij dhe evidenton sendet më të çuditshme, objektet më të harruara dhe qytetet më “harraqe” në Shtetet e Bashkuara.
Sipas Uber, Nju Jorku është shpallur qyteti më harraq i Amerikës, ndërsa e diela rezulton dita kur pasagjerët harrojnë më shumë sende në automjete.
Mes objekteve më të pazakonta të raportuara këtë vit janë dokumente daljeje nga spitali George Washington, një fotografi e Jezu Krishtit e zbukuruar me gurë dekorativë, 20 kilogramë sallam rosash, implante të legenit, një sy protezë fëmije dhe një palë dhëmbë të pjesshëm të mbështjellë me letër.
Uber bëri të ditur se gjatë vitit të fundit janë raportuar si të humbur më shumë se një milion telefona celularë.
Kompania ka evidentuar gjithashtu sendin më të çuditshëm të harruar për çdo vit që prej nisjes së raportit:
- 2017: Karavidhe
- 2018: Dokumente divorci
- 2019: Kokë salmoni
- 2020: Varëse me mbishkrimin “Virginity Rocks”
- 2021: Një pikturë e madhe e Kate Middleton
- 2022: 500 gramë havjar
- 2023: Një qen pudël lodër i harruar në makinë
- 2024: Të pasme artificiale
- 2025: Lepur i balsamosur
- 2026: Akuarium me kapacitet 75 gallonë
Sipas kompanisë, objektet më të harruara gjatë vitit të fundit kanë qenë kufjet pa tela, cigaret elektronike, kukullat Labubu, protezat dentare dhe sandalet Crocs.
Uber njoftoi gjithashtu se deri në fund të vitit do të lançojë një sistem të ri për raportimin dhe gjetjen e sendeve të humbura në aplikacion.
