Gjykata Kushtetuese ka vlerësuar se masa e arrestit shtëpiak ndaj ish-kryeministrit dhe kryetarit të Partisë Demokratike, Sali Berisha, është mbajtur për një periudhë më të gjatë se sa afati i arsyeshëm, duke i dhënë të drejtë pretendimeve të tij.
Sipas raportimit të gazetares Klodiana Lala, vendimi është marrë pa praninë e palëve dhe lidhet me tre vendime të gjykatave më të ulëta, të cilat kishin pranuar në mënyrë të përsëritur kërkesat e SPAK për vijimin e kësaj mase sigurie.
Avokatët e Berishës kishin kundërshtuar vazhdimisht zgjatjen e arrestit shtëpiak gjatë seancave të raportimit dymujor, duke argumentuar se masa po kthehej në ndëshkim dhe jo në mjet procedural. Nga ana tjetër, SPAK kishte këmbëngulur në vazhdimin e saj.
Në janar të vitit 2025, masa e arrestit shtëpiak u zëvendësua me “detyrim paraqitjeje”, vendim që tashmë gjen mbështetje edhe në vlerësimin e Gjykatës Kushtetuese, e cila ka theksuar tejkalimin e afatit të arsyeshëm të kufizimit të lirisë.
Vendimi i Kushtetueses pritet të ketë ndikim të drejtpërdrejtë në debatin politik dhe juridik mbi përdorimin e masave të sigurisë dhe respektimin e të drejtave themelore në proceset penale.
