Më shumë se 20 vende që mbështesin Ukrainën janë zotuar të “heqin naftën dhe gazin rus nga tregu global”, në kuadër të përpjekjeve për të shtuar presionin ndaj Presidentit Vladimir Putin dhe për t’i prerë financimet makinerisë së tij të luftës.
“Ne po i mbyllim rubinetat financiare makinës së luftës së Rusisë,” deklaroi Kryeministri britanik Keir Starmer, pas samitit të mbajtur në Londër me të ashtuquajturën “koalicioni i të gatshmëve”.
Në ditët e fundit, Britania e Madhe dhe Shtetet e Bashkuara kanë sanksionuar dy kompanitë më të mëdha të naftës në Rusi, ndërsa Bashkimi Europian ka vendosur kufizime mbi eksportet e gazit natyror të lëngshëm (LNG) nga Moska.
Presidenti ukrainas Volodymyr Zelensky, i pranishëm në samit, theksoi se “presioni është e vetmja mënyrë për ta ndalur luftën”, por theu pritshmëritë e atyre që shpresonin në njoftime për raketa me rreze të gjatë veprimi. Zelensky ka kërkuar prej kohësh raketa amerikane Tomahawk dhe sisteme evropiane për të goditur objektivat ushtarake në thellësi të territorit rus.
Megjithatë, gjatë bisedimeve të fundit në Uashington, Presidenti Donald Trump nuk u shpreh i gatshëm t’i furnizojë këto armë, ndërsa Putin paralajmëroi se çdo sulm në territorin rus “do të marrë një përgjigje shkatërruese”.
Starmer tha se Putin nuk është serioz për paqen, duke njoftuar një “plan të qartë për mbështetjen e Ukrainës gjatë pjesës së mbetur të vitit”, që përfshin edhe përdorimin e aseteve sovrane të ngrira të Rusisë për të financuar mbrojtjen e Ukrainës.
Ndërkohë, udhëheqësit e BE-së kanë rënë dakord të ndihmojnë Ukrainën financiarisht për dy vitet e ardhshme, por ende nuk kanë arritur konsensus për përdorimin e 140 miliardë eurove të aseteve të ngrira ruse. Kryeministrja daneze Mette Frederiksen shprehu shpresën që një vendim për këtë të merret deri në Krishtlindje.
Koalicioni gjithashtu premtoi të forcojë mbrojtjen ajrore të Ukrainës, ndërsa Zelensky paralajmëroi se Rusia “po përpiqet ta kthejë dimrin në armë torture” ndaj civilëve.
Në terren, Rusia ka vazhduar sulmet ajrore ndaj qyteteve si Kharkiv dhe Odesa, duke shkaktuar ndërprerje të energjisë, ujit dhe ngrohjes, ndërsa qytetarët shprehen se jeta e përditshme po bëhet gjithnjë e më e vështirë.
View this post on Instagram
Në samitin e Londrës morën pjesë edhe Sekretari i Përgjithshëm i NATO-s, Mark Rutte, dhe Kryeministri holandez Dick Schoof, ndërsa liderë të tjerë si Emmanuel Macron u përfshinë përmes video-konference.
Megjithë deklaratat e forta, aleatët e Ukrainës nuk dhanë shembuj konkretë se si do ta detyrojnë Kremlinin të ndalë luftën, ndërsa Moskë e ka refuzuar idenë për “ngrirje të frontit”, duke e konsideruar si kapitullim të Kievit.
