FJALA E KRYETARIT TË PD-së, SALI BERISHA NË TUBIMIN QYTETAR
EKSTRAKT
Pas vendimit të Gjykatës së Apelit për të rikthyer vulën dhe simbolet në PD, kryetari i Partisw Demokratike Sali Berisha ka mbajtur fjalën e tij nw tubimin qytetar, duke e quajtur ditwn e sotme, si njw një nga ditët më të veçanta në historinë, në përpjekjen e shqiptarëve për demokraci. ‘Fakti që ky flamur sot dhe përjetë na përket ne është një mrekulli e lirisë për të gjithë shqiptarët!’, u shpreh Berisha në tubimin që zhvillohet në mbështetje të tij në ‘Rrugën e Shpresës’.
Lideri i opozitës, Sali Berisha është bashkuar me fitoren dhe gëzimin e demokratëve pas vendimit të Gjykatës së Apelit për të rikthyer vulën dhe simbolet në Partinë Demokratike, duke e quajtur si fitorja më e rëndësishme në histori.
Kryetari i Partisë Demokratike, Sali Berisha i ka bërë thirrje çdo demokrati që ende nuk është bashkuar me selinë blu, se e kanë derën e hapur. ‘Dera është e hapur për kontributin dhe mendimin ndryshe të garantuar për çdo demokrat! Sot nuk ka fituar Berisha, por ka fituar demokracia’, u shpreh Berisha në tubimin qytetar që zhvillohet në mbështetje të tij në ‘Rrugën e Shpresës’.
Lideri i opozitës, Sali Berisha ka vlerësuar guximin dhe integritetin e tre gjyqtareve të Gjykatës së Apelit, të cilat vendosën që vula dhe logo të rikthehen në Partinë Demokratike. ‘Sot gjyqtaret guximtare kryen aktin më të madh të trimërisë; ato guxuan dhe thanë të vërtetën’, u shpreh Berisha.
Kryetari i Partisë Demokratike, Sali Berisha ka theksuar se mesazhi që duhet dhënë çdo ditë është bashkimi i demokratëve. ‘Mesazhi më i rëndësishëm që duhet dhënë dhe që duhet ta japim çdo ditë është vetëm një: bashkim, bashkim, bashkim!’, u shpreh Berisha.
Kryedemokrati Sali Berisha i ka bërë thirrje të gjithë faktorëve politikë, partive të mëdha dhe të vogla, qytetarëve pa parti, që të bashkohen për të shpëtuar Shqipërinë. ‘Ju ftoj të përbashkohemi rreth këtij flamuri dhe në një aleancë historike shqiptare, bashkë të shpëtojmë Shqipërinë’, theksoi Berisha në protestën maratonë në ‘Rrugën e Shpresës’.
FJALA E PLOTE:
Të dashur demokrate dhe demokratë në Shqipëri dhe kudo që jeni sonte!
Të dashur qëndrestare dhe qëndrestarë të pamposhtur!
Simpatizante dhe simpatizantë të Partisë Demokratike!
Sot është një nga ditët më të veçanta në historinë, në përpjekjen e shqiptarëve për demokraci.
Në 33 vite, ne së bashku kemi kaluar plot ditë gëzimi.
Kemi shënuar fitore historike për kombin.
Kemi realizuar projekte jetëndryshuese për shqiptarët.
Kemi fituar zgjedhjet, madje kemi pasur edhe fatin dhe bekimin e rrallë, që shumë pak vetave u jepet në kohëra, që të ndajmë epokat dhe të ndryshojmë historinë.
Nga kjo kronologji ngjarjesh, gëzimesh, fitorja për të cilën duhet të ndihemi më shumë krenarë, është fitorja e sotmja kundër diktaturës të bazuar në aleancën me krimin, drogën, vjedhjen e shqiptarëve.
Duhet të ndjehemi sot krenarë që sepse qëndruam fort për këtë flamur!
Fakti që ky flamur sot dhe përjetë na përket ne është një mrekulli e lirisë për të gjithë shqiptarët!
Sepse të gjithë e pamë çfarë ndodhi. Këtë flamur kërkuan ta zhdukin! Çdo pushtues, çdo barbar kur ngul kthetrat e sundimit në një komb apo shoqëri, më së pari kërkon të shkatërrojë simbolet e vlerave.
Shqiptarët e dinë këtë më mirë se kushdo tjetër. Sepse në një nga kapitujt më të nxirë të historisë sonë, regjimi i Enver Hoxhës shkatërroi simbolet fetare, përdhosi simbolet kombëtare. Në 45 vite diktaturë komuniste me persekutime, tortura dhe vrasje, akti makabër ndaj simboleve do të mbetët një nga krimet më tronditëse nga histori.
Dhe jo shumë vonë, Zoti dhe kombi shqiptar i dënuan ata për gjithë krimet e tyre ndaj shqiptarëve.
Duke sjellë në jetë këtë flamur ngjyrë blu, këtë flamur që u priu shqiptarëve në vitin 1992, dhe rrëzuan diktaturën më të egër në Europë, sot çdo shqiptar ndjen flladin e lirisë qëpo vjen.
Sot më shumë se kurrë sepse historinë po kërkojnë ta ndryshojnë. Ky flamur realizoi të pamundurën. Shembi komunizmin.
Kjo ndodhi sepse te ky flamur u derdh besimi i gjithë shqiptarëve për mundësitë e pafundme që ofron ky komb i bekuar.
Te ky flamur lindi ëndrra e shqiptarëve për liri. Dhe me këtë flamur demokracia në Shqipëri erdhi në jetë!
Ishte nën shëmbëlltyrën e këtij flamuri, që Shqipëria nga honet e historisëm, u bë zonje dhe u ngjit në piedestalin e fitoreve të mëdha dhe me këtë flamur ajo do bëhet zonjë e rëndë ashtu siç e deshën ata që e themeluan!
Por vitet e fundit, me të njëjtën egërsi që komunistët shkallmuan simbolet fetare, përdhosen simbolet kombëtare, kërkuan në hakmarrjen më primitive të zhduknin flamurin e lirisë, e demokracisë në Shqipëri
Këtë flamur kërkuan ta grabisnin!
Këtë flamur kërkuan ta tjetërsojnë.
Ishte planifikuar që ky flamur të zhdukej dhe të mbetej një relike e historisë.
Kësaj here jo nga komunistët, por nga një formë e re perverse diktature, që së fundmi u pagëzua edhe nga mediat ndërkombëtare si shtet i mafies, si narkoshteti!
Ishte pikërisht lufta jonë ndaj këtij narkoshteti, ishte ekspozimi që u bëmë vjedhjeve të tyre monstruoze, denoncimet qe ne bëmë ndaj krimeve të Edi Ramës, që nisën këtë luftë të egër ndaj flamurit të Partisë Demokratike.
Dhe e paguam me sakrifica këtë luftë kundër narkoshtetit.
Që nga kryetari, që është prej muajsh në arrest pa asnjë akuzë, e deri te mbështetësi më i ri i Partisë Demokratike, të gjithë kemi bërë pjesën tonë të sakrificave.
Por pse sakrifikojmë ne?
Ne sakrifikojmë për dinjitetin e shqiptarëve.
Ne sakrifikojmë për pluralizmin politik.
Ne sakrifikojmë për interesin kombëtar.
Ne sakrifikojmë për demokracinë.
Dhe në këto sakrifica, ne ia dolëm që ta shpëtojmë flamurin e Partisë Demokratike.
Me këtë flamur ne sot i fshijmë lotët Shqipërisë, e cila në 10 vite ka humbur 35% të bijve dhe bijave të saj nga regjimi i Edi Ramës.
Nga një shpopullim genocidal, që se ka parë kurrë historia e Shqipërisë.
Nga një shpopullim genocidal, plotësisht i qëllimshëm, nga narkoshteti i Edi Ramës.
Prandaj nga gjithë fitoret dhe gëzimet e demokratëve, fitorja e sotmja do të shënohet në histori si ajo më e rëndësishmja.
Sepse sot ky flamur u përjetësua, si simboli i kryengritjes më epike të shqiptarëve ndaj së keqes.
Miqtë e mi!
Kam marrë me qindra e e mijëra mesazhe.
Por do u citoj vetëm dy prej tyre. Njërin e kam nga Shqipëria, një avokat i vërtetë i demokracisë dhe vlerave të saj, publicist, shkrimtar, më shkruan se u gëzova aq shumë nga ky lajm, saqë përqafoj çdo njeri që më del përpara në rrugë.
Mesazhi tjetër vjen nga njëra prej mikeve më të shquara të këtij kombi, e cila shkruan se pasi mora këtë lajm, u shkreha në lot për Shqipërinë dhe shqiptarët nga gëzimi.
Sot është dita të përulem me respektin më të madh përpara çdo demokrateje e demokrati që shkroi historinë në Kuvendin e 11 Dhjetorit, të shpëtimit të opozitës në Shqipëri!
Kjo nuk është historia e Sali Berishës, por historia e demokracisë dhe opozitarizmit, është mishërimi i aksiomës se Zoti është me qëndrestarët, me guximtarët! Lavdi Zotit!
Askush nuk e ka provuar vërtetësinë e kësaj aksiome se sa ne, demokratët shqiptarë.
E provuam gjatë 30 viteve, në fillimet e pluralizmit dhe rrëzimin e diktaturës.
E provuam në vitin 1997, gjatë rebelimit komunist kur u ngritëm si Feniksi nga hiri dhe u rikthyem përsëri.
E provuam këto dy vite, pavarësisht presionit, padrejtësive e kërcënimeve, ne ia dolëm të mbetemi të lirë, të mos kapemi, të mos shitemi dhe të mbi të gjitha të mos zhdukemi.
Qëndruam për FLAMUR!
Qëndruam për FLAMUR!
Në këtë flamur sot valëvitet demokracia.
Në këtë flamur sot valëvitet liria.
Në këtë flamur sot valëvitet shpresa.
Në këtë flamur sot valëvitet beteja dhe fitorja e ardhshme.
Ky flamur sot është një mësim që çdo betejë mund të fitohet. Dhe çdo e keqe mund të kapërcehet!
Sot është dite e mirë për çdo demokrat e demokrate që nuk është me Sali Berishën, por që është me Partinë Demokratike, me flamurin e saj, pasi ky flamur fshin çdo pengesë, çdo ndarje të tyre me shumicën e vëllezërve dhe motrave!
Dera është e hapur për kontributin dhe mendimin ndryshe të garantuar për çdo demokrate dhe demokrat!
Sot nuk ka fituar Sali Berisha, por ka fituar demokracia. Sot ka fituar çdo shqiptar që beson se me pluralizmin e marrë peng, liria nuk ekziston. I vetmi i humbur sot është Edvin Kristaq Rama.
Miqtë e mi!
Sot gjyqtare guximtare kryen aktin më të madh të trimërisë; ato guxuan dhe thanë të vërtetën.
Xhorxh Oruell thotë se: “Të thuash të vërtetën në një kohë mashtrimi, është një akt revolucionar”.
Këtij vendimi, historia do t’i njohë meritën e madhe të parandalimit të një mynxyre të vërtetë për vendin, kapjen e pluralizmit politik nga partia.
Nuk kam dyshuar kurrë se kudo ka burra dhe gra, djem dhe vajza të ndershëm.
Ka njerëz, të cilët jetojnë për nderin, dinjitetin e tyre.
Por këto gjykatëse, me vendimin e tyre iu përbajtën ligjit dhe vetëm ligjit.
Sali Berisha, bashkëpunëtorët e tij, nga shtatori i vitit 1991 gjer sot, kanë bazuar ligjin dhe vetëm ligji.
Ndaj dhe dua të shpreh një mirënjohje të thellë ndaj tyre, por edhe ndaj gjyqtarëve të tjerë,të cilët nuk pranuan, pavarësisht bindjeve që mund të kenë, të marrin peng pluralizmin politik.
Patriotë të vërtetë, injoruan çdo vendim dhe vendosën në përputhje me ligjet dhe Kushtetutën.
Por miqtë e mi, të mos kemi keqkuptime.
Beteja vazhdon. Narkoshteti nuk donte që ne të merrnim këtë flamur sot.
Edi Rama sonte flet me vete, nuk fle
Prandaj betejat më të nxehta, ne i kemi para.
Dhe sot mesazhi më i rëndësishëm që duhet dhënë dhe që duhet të japim çdo ditë është vetëm një: bashkim, bashkim, bashkim!
Demokrate e demokratë, sot nuk ka më parti me vulë, parti pa vulë.
Sot nuk ka më PD të vërtetë, PD të pavërtetë.
Sot ka vetëm një Parti Demokratike, e bashkuar rreth flamurit të saj, flamurit të lirisë, flamurit të fitores.
Sot ka vetëm një opozitë të bashkuar. Një parti uragan i pamposhtur opozitar që do sjellë rotacionin dhe do ta shkatërrojë narkoshtetin e Edi Ramës, ashtu siç Edi Rama tentoi të shkatërrojë flamurin tonë!
I bëj thirrje pra edhe njëherë, atyre atyre demokratëve që ende nuk na janë bashkuar. Kontributi i secilit është i vyer.
Investimi i tyre kurrë nuk mohohet.
Në protestën madhështore të 20 shkurtit, ne e vërtetuam se të bashkuar në diversitet, është formula ynë fituese.
Ndaj mos hezitoni të na bashkoheni sa më shpejt. Ju mirëpresim!
I bëj thirrje çdo opozitari që nuk është pjesë e Partisë Demokratike. Opozitarëve të vjetër dhe
atyre të rinjve. Partive të mëdha dhe atyre të vogla. Nëse jeni kundër Edi Ramës. Nëse jeni kundër narkoshtetit. Nëse jeni kundër inceneratorëve. Kundër vjedhjeve 100%. Kundër krimit. Dhe mbi të gjitha kundër shpopullimit.
Atëherë t’i bashkojmë forcat. Mund të mos jeni me Partinë Demokratike, por pa Partinë Demokratike nuk e rrëzoni dot Ramën. Prandaj dyert tona janë të hapura për çdo opozitar të vërtetë.
Dhe i bëj thirrje çdo shqiptari. Partia Demokratike qëndroi për të vërtetën. Ajo po rikthehet.
Nëse jeni pro familjes.
Nëse jeni për paga të dyfishuara.
Nëse jeni për dinjitetin e shqiptarëve.
Nëse jeni për interesin kombëtar.
Nëse jeni për demokracinë.
Atëherë ky është flamuri juaj. Ky është flamuri i fitores që do ta shembë narkoshtetin.
Prandaj ju ftoj të përbashkohemi rreth tij dhe në një aleancë historike shqiptare, bashkë të shpëtojmë Shqipërinë.
Për ta mbyllur, edhe njëherë një falenderim dhe mirënjohje e pakufishme për gjithë demokratët që nisën lëvizjen me Kuvendin e 11 dhjetorit.
Një falenderim për foltoret.
Një falenderim për qëndresën tuaj në Rrugën e Shpresës, qëndrestare dhe qëndrestarë të pamposhtur.
Një falenderim që Rithemelimin e kthyet në një histori suksesi. Një falenderim për këtë faqe të re që shkruajtët në historinë e demokracisë së Shqipërisë.
Rrofshi ju!
Rroftë Partia Demokratike!
Rroftë flamuri blu!
Rroftë Shqipëria!
