Drejtori ekzekutiv i Meta, Mark Zuckerberg, dëshmoi në Gjykatën e Lartë të Los Anxhelosit në një proces historik që shqyrton nëse rrjetet sociale kanë dëmtuar shëndetin mendor të fëmijëve.
Ai u përball me pyetje të forta nëse Instagram është projektuar qëllimisht për të krijuar varësi, përpara një jurie dhe përpara një të reje që pretendon se platforma e dëmtoi që në fëmijëri.
Zuckerberg tha se ka vepruar “në mënyrë të arsyeshme” për sigurinë e përdoruesve të rinj, por jashtë sallës së gjyqit, prindër që pretendojnë se kanë humbur fëmijët për shkak të rrjeteve sociale akuzuan kompaninë për shfrytëzim në emër të fitimit.
Çështja “Kaley” dhe akuzat për varësi
Paditësja, e identifikuar si “Kaley”, pretendon se Meta dhe YouTube krijuan funksione varësie që e mbajtën të lidhur me aplikacionin që në moshën 9-vjeçare.
Sipas avokatit të saj, ajo përdorte Instagram-in për orë të tëra në ditë, madje njëherë për mbi 16 orë rresht. Ajo pretendon se zhvilloi ankth, çrregullime të imazhit trupor dhe mendime vetëvrasëse, si dhe u përball me bullizëm dhe shantazh seksual në platformë.
Meta i ka mohuar akuzat, duke deklaruar se kompania ka investuar në masa sigurie për të miturit, përfshirë mjete kontrolli prindëror dhe llogari “teen” me kufizime të paracaktuara.
Pyetje mbi politikat e moshës
Instagram kërkon zyrtarisht që përdoruesit të jenë të paktën 13 vjeç, por dokumente të brendshme të vitit 2015 sugjerojnë se mbi 4 milionë përdorues ishin nën këtë moshë.
Avokati i paditëses theksoi se deri në vitin 2019, platforma nuk kërkonte datëlindjen gjatë regjistrimit – thjesht konfirmimin se përdoruesi ishte mbi 13 vjeç.
Zuckerberg pranoi se ka pasur “shqetësime për privatësinë” në atë kohë, por argumentoi se kompania më pas vendosi politika më të forta.
Filtrat e bukurisë dhe koha në aplikacion
Në një tjetër moment të tensionuar, Zuckerberg u pyet për filtrat “beauty” që modifikojnë pamjen e përdoruesve. Sipas padisë, ekspertët kishin paralajmëruar se këto filtra mund të dëmtojnë vetëvlerësimin e të rinjve.
Avokati gjithashtu e përballi me një email të vitit 2015 ku përmendej një objektiv për rritjen e kohës së kaluar në Instagram me 10%.
“Ne dikur u vendosnim ekipeve objektiva për kohën, por më pas ndryshuam qasje për t’u fokusuar tek ‘vlera dhe dobia’,” tha Zuckerberg.
Çfarë rrezikon Meta?
Ky proces mund të shërbejë si precedent për qindra çështje të tjera. Nëse humb, Meta mund të përballet me miliarda dollarë dëmshpërblime dhe me detyrimin për të ndryshuar mënyrën se si funksionojnë platformat e saj.
Gjykata duhet të vendosë nëse Instagram ka qenë një faktor thelbësor në problemet e shëndetit mendor të paditëses.
