Presidenti i Serbisë, Aleksandar Vuçiq, ka intensifikuar akuzat ndaj Kosova, Shqipëria dhe Kroacia, duke pretenduar se këto vende kanë krijuar një “aleancë ushtarake sulmuese” kundër Serbisë.
Në një intervistë për TV Informer, Vuçiq deklaroi se, sipas tij, Tirana, Prishtina dhe Zagrebi po përgatisin një bosht ushtarak, duke shfrytëzuar tensionet mes Perëndimit dhe Rusisë. “Kjo është një aleancë sulmuese. Ka njerëz që ëndërrojnë se një konflikt global do të ishte mundësi për shkatërrimin e Serbisë”, u shpreh presidenti serb.
Akuza vjen në vazhdën e deklaratave të përsëritura nga Beogradi, pas nënshkrimit në mars 2025 të një deklarate për forcimin e bashkëpunimit në mbrojtje mes ministrave të Mbrojtjes të Kroacisë, Shqipërisë dhe Kosovës. Megjithatë, autoritetet kroate kanë sqaruar vazhdimisht se dokumenti nuk synon krijimin e një aleance ushtarake dhe se nuk ka nevojë për struktura paralele përkrah NATO.
Në këtë kontekst, kryeministri i Kroacisë, Andrej Plenkoviq, ka reaguar qartë, duke hedhur poshtë çdo aludim për dërgim trupash kroate në Ukrainë. Gjatë hapjes së mbledhjes së Qeverisë, Plenkoviq deklaroi se Kroacia nuk e ka shqyrtuar kurrë një opsion të tillë.
“Ashtu siç e kemi thënë gjatë gjithë këtyre viteve, Kroacia kurrë nuk e ka shqyrtuar dërgimin e ushtarëve të saj në Ukrainë, por do të vazhdojë ta mbështesë Ukrainën politikisht, ekonomikisht, energjetikisht dhe ushtarakisht”, u shpreh ai, duke iu referuar takimit të Koalicionit të të Vullnetshmëve në Paris, ku u diskutua për garancitë e sigurisë dhe mundësinë e forcave paqeruajtëse shumëkombëshe pas një armëpushimi.
Deklarata e Plenkoviqit vjen vetëm një ditë pasi edhe presidenti i Kroacisë, Zoran Milanoviq, në cilësinë e komandantit suprem të Forcave të Armatosura, theksoi se Kroacia nuk do të dërgojë trupa në Ukrainë.
Kryeministri kroat shtoi se Zagrebi do të vijojë të ndihmojë Ukrainën edhe në fushën e mbrojtjes civile, shpëtimit dhe energjisë, duke njoftuar se Qeveria kroate pritet të miratojë vendime të reja për mbështetje shtesë.
Ndërkohë, deklaratat e Vuçiqit dhe reagimet nga Zagrebi nxjerrin në pah kontrastin e fortë mes retorikës politike në rajon dhe pozicioneve zyrtare të vendeve anëtare të NATO-s, të cilat theksojnë transparencën, bashkëpunimin dhe shmangien e përshkallëzimit të tensioneve.
