Një ngjarje e rëndë ka tronditur qytetin e Kaçanikut mbrëmjen e së martës ku rreshteri i policisë, Muhamed Lika, është vrarë me armë zjarri pranë hyrjes së banesës së tij.
Sipas raportimeve të para, Lika është qëlluar disa herë nga persona ende të paidentifikuar, duke pësuar plagë të rënda që i kanë marrë jetën në vendngjarje. Autoritetet policore kanë rrethuar zonën dhe kanë nisur hetimet për të zbardhur rrethanat e këtij krimi të rëndë.
Njësitet hetimore po punojnë intensivisht për të identifikuar dhe kapur autorët e mundshëm të këtij sulmi, ndërsa trupi i pajetë i viktimës është dërguar për ekspertizë mjeko-ligjore.
Deri më tani, motivet e ngjarjes mbeten të paqarta, por autoritetet kanë bërë thirrje për bashkëpunim nga qytetarët që mund të kenë informacione të vlefshme për hetimin.
Kjo ngjarje ka shkaktuar shqetësim të madh në komunitetin e Kaçanikut dhe në radhët e Policisë së Kosovës, ndërsa pritet që institucionet të dalin me më shumë detaje në orët në vijim.
