Një ngjarje e rëndë ka tronditur mbrëmjen e së dielës qytetin e Elbasanit, ku biznesmeni i njohur lokal Edmond Mehalla, pronar i “Xhaxho Oil” dhe “EL Taxi”, është ekzekutuar me armë zjarri.
Sipas të dhënave paraprake, rreth orës 20:35, në lagjen “Emin Matraxhiu”, Mehalla është qëlluar me dy plumba në kokë dhe tre të tjerë në trup, teksa ndodhej brenda automjetit të tij, i parkuar pranë karburantit të familjes, në Unazën Jugore të Elbasanit. 43-vjeçari sapo kishte dalë nga zyra dhe ishte ulur në makinë kur autorët i janë afruar dhe e kanë qëlluar në vend.
Pasi u siguruan se viktima kishte ndërruar jetë, atentatorët janë larguar me një Audi të zi, në drejtim të aksit Elbasan–Librazhd.
Mehalla, sipas burimeve mediatike, kishte qenë më herët i proceduar për shpërndarje narkotikësh dhe armëmbajtje pa leje, ndërsa familja Mehalla njihet për një hasmëri të vjetër, çka ka bërë që shumë anëtarë të saj prej vitesh të jetojnë jashtë vendit.
Vetë viktima jetonte në Tiranë te Komuna e Parisit.
Njoftimi zyrtar i Policisë së Shtetit
Elbasan / Informacion paraprak
“Rreth orës 20:35, është marrë njoftim se në lagjen ‘Emin Matraxhiu’, brenda në një automjet të parkuar, është gjetur i vrarë me armë zjarri shtetasi M. M., alias E. H., 43 vjeç.
Në vendngjarje shkuan menjëherë shërbimet e Policisë dhe janë ngritur pika kontrolli në dalje të qytetit. Vijojnë kontrollet në zonë dhe në ambiente të ndryshme për kapjen e autorit/ëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe identifikimin dhe kapjen e autorit/ëve.”
