Stamboll, 23 Mars 2025 – Dhjetëra mijëra qytetarë kanë dalë në rrugët e Stambollit për të pestën ditë radhazi, duke protestuar kundër arrestimit të kryebashkiakut Ekrem Imamoglu, i cili shihet si një rival i fortë i presidentit Recep Tayyip Erdogan.
Imamoglu u arrestua nën akuzat për korrupsion, por mbështetësit e tij dhe figura të opozitës i cilësojnë akuzat si një përpjekje politike për ta larguar nga skena. Dilek Imamoglu, bashkëshortja e tij, i quajti akuzat “të paligjshme” dhe një shembull të “padrejtësisë së hapur”.
Duke folur sot përpara turmës, Dilek Imamoglu u shpreh:
“Burri im është një njeri i ndershëm dhe i përkushtuar ndaj qytetarëve të Stambollit. Arrestimi i tij nuk ka të bëjë me drejtësinë, por me frikën e pushtetit nga një kandidat i fortë dhe i dashur nga populli. Kjo nuk është vetëm një padrejtësi ndaj Ekremit, por ndaj të gjithë atyre që besojnë në demokraci dhe të drejtat e njeriut.”
View this post on Instagram
Protestuesit janë mbledhur para Bashkisë së Stambollit, duke valëvitur flamuj dhe duke kërkuar lirimin e menjëhershëm të kryebashkiakut. Ndërkohë, reagime të forta kanë ardhur edhe nga liderët e opozitës, të cilët akuzojnë qeverinë për përdorimin e drejtësisë si një mjet politik për të heshtur kundërshtarët.
Situata mbetet e tensionuar, ndërsa autoritetet kanë shtuar praninë e forcave të sigurisë për të kontrolluar protestat në rritje.
