Tiranë – Një zjarr i fuqishëm ka përfshirë pasditen e sotme një banesë pranë Pazarit të Ri, e njohur si shtëpia e Nermin Stërmasit, figurë historike dhe një nga personalitetet e njohura të qytetit.
Flakët janë konstatuar nga banorët e zonës, të cilët kanë njoftuar menjëherë shërbimet zjarrfikëse. Ekipet ndërhynë me shpejtësi për të shmangur përhapjen e zjarrit në godinat përreth dhe për të vënë situatën nën kontroll.
View this post on Instagram
Fatmirësisht nuk raportohet për të lënduar, ndërkohë që dëmet materiale janë të konsiderueshme. Shkaqet e shpërthimit të zjarrit mbeten ende të paqarta dhe po hetohen nga autoritetet.
Zona e Pazarit të Ri, një nga më të frekuentuarat në kryeqytet, u përfshi për pak minuta nga paniku, ndërsa flakët dhe tymi u panë nga një distancë e largët.
Nermin Stërmasi (1910 – 2003) ishte një personalitet i njohur i Tiranës, e njohur kryesisht si një nga figurat e para të emancipimit të gruas në Shqipëri dhe për përfshirjen e saj në jetën kulturore dhe sociale të kryeqytetit. Ajo i përkiste familjes së njohur Stërmasi, një familje me ndikim në jetën shoqërore dhe sportive të Tiranës.
Nermin Stërmasi njihet edhe për rolin e saj në ruajtjen dhe promovimin e kulturës së kryeqytetit, si dhe për angazhimin e hershëm në shoqatat e grave shqiptare. Ajo ishte pjesë e brezit të parë të grave tiranase që u arsimuan dhe që kontribuan për përparimin e rolit të femrës në shoqëri.
Shtëpia e familjes Stërmasi, ku ajo ka jetuar, është një ndër ndërtimet karakteristike të Tiranës së viteve ’30, me vlera historike dhe arkitektonike për qytetin.
