Këngëtari shkodran Alis është shpallur fitues i Festivali i Këngës 64, duke rrëmbyer çmimin e parë me këngën “Nân”, një performancë që fitoi njëkohësisht zemrat e publikut dhe vlerësimin maksimal të jurisë.
Kjo fitore i siguron Alis-it të drejtën për të përfaqësuar Shqipërinë në Eurovision 2026, që do të zhvillohet në Vjenë, Austri, në një nga eventet muzikore më të ndjekura në Evropë.
Interpretimi i këngëtarit u veçua për potencën vokale, interpretimin emocional dhe mesazhin universal për dashurinë, duke e bërë këngën “Nân” një nga momentet më të forta artistike të finales së madhe. Ovacionet dhe duartrokitjet e gjata shoqëruan fundin e interpretimit, duke konfirmuar lidhjen e fortë të këngës me publikun.
Çmimi i parë iu dorëzua Alis nga kryetari i jurisë së Festivalit, Ramë Lahaj. Në total, Alis grumbulloi 152 pikë, nga kombinimi i votave të publikut dhe pikëve të jurisë.
Në vendin e dytë u rendit Inis Neziri me 102 pikë, ndërsa Sheila u pozicionua në vendin e tretë me 93 pikë. Sipas renditjes së jurisë profesionale, Alis u vlerësua i pari, i ndjekur nga Sheila dhe Vedat Ademi.
Formula e votimit, ishte e bazuar në 50% vota të jurisë dhe 50% vota të publikut.
Momenti i marrjes së kupës ishte tejet emocional për Alis-in, i cili u përlot në skenë, puthi trofeun dhe, si dhuratë për publikun, interpretoi edhe një herë këngën fituese, duke mbyllur Festivalin e 64-t të Këngës me një atmosferë të fortë emocionale.
Fitorja e Alis konfirmon edhe një herë rolin e Festivalit të Këngës si gara më prestigjioze muzikore në vend dhe si porta kryesore që çon talentet shqiptare drejt skenës më të madhe evropiane.
