Liderja e opozitës venezueliane, María Corina Machado, ka publikuar një “manifest të lirisë”, një dokument 4-faqësh ku paraqet vizionin e saj për një epokë të re demokratike në Venezuelë, pa presidentin autoritar Nicolás Maduro.
Dokumenti, i datës 9 nëntor dhe bërë publik të martën, kërkon rivendosjen e të drejtave themelore si vota e lirë, liria e tubimit dhe e fjalës, duke huazuar gjuhë nga Deklarata e Pavarësisë së Shteteve të Bashkuara. Machado, e cila qëndron e fshehur që prej zgjedhjeve të kontestuara të vitit të kaluar, e lexoi manifestin në një video 15-minutëshe, duke deklaruar se “epoka e Maduro-s po merr fund” dhe se “një Venezuelë e re po ngrihet si feniksi nga hiri”.
Publikimi i manifestit vjen në një moment tensioni të lartë rajonal, pasi SHBA ka dislokuar mbi 12 anije luftarake dhe rreth 15 mijë trupa pranë brigjeve të Venezuelës në një operacion kundër trafikut të drogës — prania më e madhe ushtarake amerikane në rajon që prej pushtimit të Panamasë në vitin 1989.
Presidenti Donald Trump konfirmoi se ende po shqyrton mundësinë e një ndërhyrjeje, por la të hapur edhe opsionin e dialogut. “Do të flisja me Maduro-n në një moment të caktuar,” tha ai.
Maduro reagoi duke deklaruar në televizionin shtetëror se është i gatshëm për bisedime direkte. Ndërkohë, qeveria e Venezuelës ka dënuar dislokimin ushtarak amerikan, duke e cilësuar “përpjekje për ta rrëzuar nga pushteti”.
Machado, që ka mbështetur presionin amerikan, akuzon Maduro-n për krime kundër njerëzimit, përfshirë tortura, vrasje dhe zhdukje të detyruara — akuza që regjimi i Karakasit i ka mohuar. Në tetor, ajo u nderua me Çmimin Nobel për Paqen për rolin e saj në mbrojtjen e demokracisë në Venezuelë.
