Gianluca Di Gioia, një 48-vjeçar nga Roma, është vrarë nga një peshkaqen në Egjipt, në Marsa Alam, në Detin e Kuq. Një tjetër turist, gjithashtu italian, që ishte me të, ka mbetur i plagosur: bëhet fjalë për Peppino Frappani, 69-vjeçar me origjinë nga Genivolta, në provincën e Cremona-s, i cili tani është shtruar në spitalin e Porto Ghalib. Gjendja e tij nuk duket e rëndë. Ministria e Mjedisit e vendit ka bërë të ditur se ka rritur nivelin e alarmit në Detin e Kuq pas tragjedisë. Janë organizuar menjëherë hetime urgjente për të rindërtuar dinamikën.
Sulmi në ujëra të thella
“Sulmi i peshkaqenit” ndaj dy turistëve italianë ka ndodhur “në ujëra të thella jashtë zonës së notit,” saktëson ministria egjiptiane e Mjedisit në Facebook, duke vendosur segmentin e detit “në veri të Marsa Alam.” E njëjta ministri ka konfirmuar shtrimin e të plagosurit në spitalin e Port Ghalib. Në të njëjtën strukturë, nën mbikëqyrjen e prokurorit publik, është sjellë edhe trupi i Gianluca Di Gioia.
Shkaqet e incidentit
Sipas urdhrit të ministrisë, segmenti i detit ku ndodhi fatkeqësia do të qëndrojë i mbyllur për not për disa ditë. Ndërkohë është formuar një komision urgjent për koordinimin dhe bashkëpunimin me qeverinë e Detit të Kuq dhe autoritetet e tjera përkatëse për të hetuar shkaqet e incidentit.
Viktima
Gianluca Di Gioia kishte mbushur 48 vjeç më 21 dhjetor. Ishte i martuar dhe ndodhej në Marsa Alam për pushime me familjen. U diplomua në Institutin Petrocchi në 1990, pastaj studioi në universitetin La Sapienza të Romës, ku u diplomua në 1995 për Ekonomi dhe Tregti. Ai ka punuar në qendrën kërkimore të Komisionit Europian dhe që nga viti 2012 ishte angazhuar në Shërbimin e Veprimit të Jashtëm të BE-së – Eeas, pra në shërbimin diplomatik të Bashkimit Europian. Ishte i martuar që nga viti 2013 dhe jetonte në Francë, vendi i origjinës së gruas së tij.
Miku i plagosur
Peppino Fappani, një teknolog dentar nga Soncino, në provincën e Cremona-s, ishte mik për një kohë të gjatë me Di Gioia. Gruaja e Fappani ka treguar për një kushërirë se “Di Gioia po bënte zhytje kur, papritmas, u sulmua nga peshkaqeni. Peppino u hodh në ujë duke u përpjekur të frikësojë peshkaqenin për të lejuar mikun të çlirohej.” Por nuk pati asgjë për të bërë dhe edhe Peppino u godit nga peshkaqeni. Fatmirësisht, pavarësisht nga plagët e rënda në krahë dhe këmbë, ai nuk është në rrezik për jetën dhe që në mbrëmje iu nënshtrua një operacioni kirurgjik.
Rastet e mëparshme në Detin e Kuq
Sulmet nga peshkaqenët përgjatë bregdetit egjiptian të Detit të Kuq janë ngjarje të rralla: kujtohet vdekja në Hurghada e një rusi në qershor të vitit të kaluar dhe e dy turisteve në vitin 2022 (një austriake dhe, sipas mediave, një britanike). Po ashtu në Detin e Kuq një i ri ukrainas kishte humbur një krah në vitin 2020 dhe i njëjti fat i kishte ndodhur një gruaje egjiptiane në shtator të vitit të kaluar në Dahab, në bregdetin e Sinait.
Ekosistemi i ndryshuar dhe sjellja e peshkaqenëve
Deti i Kuq është një destinacion turistik i njohur falë barrierës së tij koralore të populluar nga peshq tropikalë që e bëjnë atë të ngjashëm me një akuarium të kënaqshëm edhe vetëm me maskë. Ekspertët detarë paralajmërojnë se ndërtimi i pa kontrolluar, peshkimi i tepërt dhe praktikat e papërgjegjshme turistike kontribuojnë në ndryshimin e ekosistemit dhe sjelljen e peshkaqenëve. Po ashtu larg Marsa Alam më 25 nëntor 2024, jahti turistik “Sea Story” ishte mbytur për shkak të kushteve të pafavorshme atmosferike. Bilanci i viktimave të raportuar nga faqja e gazetës kryesore egjiptiane, Al Ahram, ishte katër të vdekur, shtatë të zhdukur dhe 33 të mbijetuar, përfshirë një qytetare belge me shtetësi të dyfishtë italiane./Tgcom
