13 Qershor 2025 – Tel Aviv / Teheran
Izraeli ka ndërmarrë një valë sulmesh ajrore kundër Iranit në orët e para të mëngjesit të së premtes, duke goditur objektiva kyçe të programit bërthamor iranian dhe infrastrukturës ushtarake. Sipas autoriteteve izraelite, sulmet shkatërruan impiante bërthamore dhe vranë të paktën tre nga komandantët më të lartë ushtarakë të Iranit. Ndërkohë, Irani u kundërpërgjigj me më shumë se 100 dronë të lëshuar drejt Izraelit, shumica e të cilëve u rrëzuan nga mbrojtja ajrore izraelite.
Ky është sulmi më i rëndë që Irani ka përjetuar që nga lufta me Irakun në vitet ’80 dhe vjen në një moment të tensionuar për shkak të përparimeve të shpejta të Teheranit në programin e tij bërthamor.
View this post on Instagram
Çfarë dihet deri tani:
- Objektivat e sulmit: Kryeministri izraelit Benjamin Netanyahu deklaroi se u godit impianti kryesor i pasurimit të uraniumit në Natanz, u eliminuan shkencëtarët kryesorë bërthamorë të Iranit dhe u shkatërruan objektiva të rëndësishëm të arsenalit me raketa balistike.
- Urdhri për sulm ishte dhënë muaj më parë: Netanyahu tha se sulmi ishte planifikuar që në nëntor 2024, pas eliminimit të liderit të Hezbollahut, Hassan Nasrallah. Fillimisht ishte planifikuar për prill, por u shty për arsye taktike.
- Komandantët e vrarë: Sipas burimeve të afërta me qeverinë izraelite, mes viktimave janë: Gjeneral Mohammad Bagheri, drejtues i përgjithshëm i forcave të armatosura iraniane; Gjeneral Hossein Salami, komandant i Gardës Revolucionare; dhe Gjeneral Amir Ali Hajizadeh, përgjegjës për programin e raketave balistike.
- Iran kundërpërgjigjet me dronë: Pas sulmeve, Irani lëshoi mbi 100 dronë në drejtim të Izraelit. Ushtria izraelite konfirmoi se shumica janë rrëzuar, por mbetet në gjendje gatishmërie të lartë, me kufijtë të mbyllur dhe me thirrjen e dhjetëra mijëra rezervistëve.
- Shpërthime në Fordo: Mediat pranë qeverisë iraniane raportuan për dy shpërthime pranë impiantit bërthamor të Fordos, që ndodhet në thellësi të tokës. Raportet flasin për dëme edhe në këtë zonë të mbrojtur.
- Reagime ndërkombëtare: Kryeministri britanik Keir Starmer dhe Presidenti francez Emmanuel Macron konfirmuan se kanë folur me Netanyahun, duke theksuar të drejtën e Izraelit për vetëmbrojtje, por edhe domosdoshmërinë për de-përshkallëzim dhe zgjidhje diplomatike.
- SHBA ishte e informuar: Netanyahu deklaroi se Shtetet e Bashkuara ishin njoftuar paraprakisht për sulmin. “Ata e dinin. Tani mbetet në dorën e Presidentit Trump çfarë do bëjë më tej,” tha ai.
Ndërkohë, dëshmitarë civilë në Teheran raportuan për shpërthime në disa pjesë të qytetit, përfshirë lindjen, perëndimin dhe qendrën e kryeqytetit, ndërsa media shtetërore iraniane ende nuk ka dhënë informacion zyrtar për këto zhvillime.
Tensionet në rajon janë në nivelet më të larta të dekadës së fundit, dhe ekziston frika reale për një konflikt të hapur mes dy fuqive më të mëdha në Lindjen e Mesme.
