Lezhë, 2 Qershor 2025 – Vijojnë hetimet intensive për zbardhjen e plotë të vrasjes së rëndë që tronditi komunitetin e fshatit Tale, në Lezhë, ku mbeti i vrarë me armë zjarri një 57-vjeçar.
Burime zyrtare nga Policia e Shtetit bëjnë me dije se, në kuadër të veprimeve të thelluara hetimore, grupi hetimor ka identifikuar dhe shpallur në kërkim një shtetas, i dyshuar si autor i kësaj ngjarjeje të rëndë.
“Bazuar në informacionet e siguruara nga inteligjenca policore, si dhe në provat e mbledhura në vendngjarje, kemi arritur të identifikojmë autorin e dyshuar të kësaj vrasjeje,” thuhet në njoftimin e policisë.
Sipas të dhënave nga hetimi, dyshohet se shtetasi G. A., për arsye hetimore pa të dhëna të mëtejshme, ka qëlluar me armë zjarri automatike në drejtim të viktimës P. K., në momentin që ky i fundit kishte zbritur nga automjeti për të hapur portën e banesës së tij. Si pasojë e të shtënave, 57-vjeçari ka ndërruar jetë në vend.
Ngjarja e rëndë ka ndodhur mbrëmjen e disa ditëve më parë dhe ngriti alarmin në radhët e komunitetit lokal. Policia dhe Prokuroria janë angazhuar në një hetim të përshpejtuar për të dokumentuar të gjitha rrethanat e krimit.
“Grupi i posaçëm hetimor, në drejtimin e Prokurorisë, vijon punën për dokumentimin e plotë ligjor të kësaj ngjarjeje kriminale,” bën të ditur më tej policia.
Ndërkohë, shërbimet e policisë vijojnë kontrollet intensive në terren, me qëllim kapjen sa më të shpejtë të autorit të dyshuar, i cili është shpallur tashmë në kërkim.
