Në drejtimin e Kryetarit të Kuvendit, Niko Peleshi, u zhvillua sot mbledhja e Konferencës së Kryetarëve. Në rendin e ditës ishte shqyrtimi i kërkesës së Grupit Parlamentar të Partisë Socialiste dhe Grupit Parlamentar të Partisë Demokratike për përcaktimin e kohës së zhvillimit të debatit lidhur me raportimet e institucioneve të pavarura, që do të diskutohen në seancën plenare të datës 30 tetor 2025.
Pas diskutimeve, Konferenca e Kryetarëve vendosi që koha e debatit për çdo raportim të jetë 90 minuta.
Kuvendi i Shqipërisë do të zhvillojë dy seanca plenare gjatë ditës së sotme.
Në orën 10:00 do të nisë shqyrtimi i nismës së opozitës për shkarkimin nga detyra të Kryetarit të Kuvendit, Niko Peleshi. Gjatë kësaj seance pritet të prezantohen dy raportet e përgatitura nga Partia Socialiste dhe Partia Demokratike.
Një nga pikat kryesore të rendit të ditës është kërkesa e deputetëve të Partisë Demokratike, e cila argumenton se Peleshi ka shkelur rëndë Kushtetutën dhe rregulloren e Kuvendit, ndaj kërkohet shkarkimi i tij nga posti i kryetarit.
Pas përfundimit të debatit për këtë çështje, Kuvendi do të zhvillojë një seancë të dytë në orën 11:30, ku do të raportojnë mbi veprimtarinë e vitit 2024 disa institucione të pavarura:
- Këshilli i Lartë i Prokurorisë (KLP)
- Avokati i Popullit
- Komisioneri për Mbikëqyrjen e Shërbimit Civil
- Instituti i Statistikave (INSTAT)
- Autoriteti i Mediave Audiovizive (AMA)
- Radiotelevizioni Shqiptar (RTSH)
Seancat e sotme pritet të jenë ndër më të ngarkuarat e këtij sesioni parlamentar, duke kombinuar debatet politike me raportimet institucionale.
