Turistët në Shqipëri/ Ja qytetet që tërheqin më shumë  të huajt

Janari nisi me rritje 14.5% të numrit të shtetasve të huaj në vendin tonë, në raport me janarin e një viti më parë, një sinjal ky që interpretohet pozitivisht për ecurinë e turizmit.

Raportimet në tërësi nuk kanë qenë uniforme, ku disa rajone raportojnë për një rritje të frekuentimit e të tjerë për ecuri më të zbehtë, por duke e lidhur këtë më shumë me kategorinë e turistit që po na viziton dhe interesat e tij.

Gjatë muajve të dimrit, por edhe në pranverë, ata që shihen më shpesh në grupe masive apo edhe si udhëtarë të vetëm, në familje apo grupe shoqërore të vogla, janë kureshtarët e kulturës.

Përgjithësisht sipas operatorëve vihet re një tendencë e europianëve për të udhëtuar në formë individuale drejt Shqipërisë si pjesë e jehonës që destinacioni vijon të ketë, pushimeve të dimrit, të cilat janë të konsiderueshme por edhe për shkak të biletave me kosto të ulët që arrijnë të gjejnë përmes disa linjave ajrore.

Porta kryesore hyrëse e turizmit është Rinasi, ashtu sikurse edhe ajo dalëse, jo vetëm për shqiptarët por për rajonin.

Por cilat janë në fakt destinacionet që po vizitojnë turistët këto kohë?

Operatorët turistikë vlerësojnë se pjesën kryesore e zënë vizitorët e lokalizuar në Tiranë, por me një interes për ture ditore në zona të afërta si Durrësi apo Kruja, por nuk mungojnë ata që shpenzojnë më shumë ditë për të shkuar drejt destinacioneve të tjera si Berati apo Gjirokastra.

Tirana, nga kuzhina te vizitat në muze, një paketë e plotë

Kryeqyteti është epiqendra që zgjon interesin e turistëve gjatë muajve të parë të vitit. Shumica parapëlqejnë që fjetja të jetë pikërisht në Tiranë teksa axhenda e tyre ditore mund të ndryshojë.

Ajo që turistët duket se pëlqejnë më së shumti është gjallëria që ka qyteti si për jetën e natës, ashtu edhe numrit të lartë të restoranteve dhe kuzhinave që ofrohen.

Alternativat e larmishme, nga ato më ekonomike deri tek ato më të shtrenjta është një tjetër pikë plus ku secili gjen veten sipas buxhetit.

Lidhur me vendet më kryesore për të vizituar, sipas vlerësimeve të lëna në janar-shkurt 2025 në Tripadvisor dhe Google Review, duket se gjithçka nis nga Sheshi Skënderbej.

Diana. M, italiane, thotë se është mirë që qyteti ka një hapësirë të tillë që duket se ofron mundësi për organizim eventesh dhe është pikënisja për të vizituar pjesën tjetër të qytetit.

Shtëpia e Gjetheve, një muze brenda qytetit që pasqyron periudhën e komunizmit, duket se është një tjetër pikë mjaft e pëlqyer.

Turistët, kryesisht britanikë, që kanë lënë komentet e tyre mbi këto vizita, kanë shprehur rezerva lidhur me mosfunksionimin e elementeve grafikë që tregojnë këtë periudhë teksa të tjerë, si për shembull JnVSydney nga Australia shprehet se ia vlen vizita për të kuptuar jetën e njerëzve në periudhën e komunizmit dhe masën ekstreme të spiunazhit që përdorej për t’i kontrolluar nga 1944 deri në vitin 1991.

Objektet e kultit janë gjithashtu pjesë tërheqëse e Tiranës. Fanny, turiste që vizitoi Xhaminë e Et’hem Beut në datë 2 mars, tha se është e mrekullueshme dhe vizitorët nuk është e nevojshme të mbulohen.

Edhe Stefano, që vizitoi këtë objekt po në datë 2 mars sipas Google Review shprehet se është e bukur për një vizitë të shkurtër dhe mbi të gjitha, hyrja është pa pagesë, por si në çdo xhami duhet të hyni pa këpucë.

Një tjetër vend që ka marrë vëmendje është Kisha Ortodokse Autoqefale. Valerie Locht, nga Franca, shprehet se ka një pamje goditëse nga jashtë dhe është mjaft e bukur.

Agnes Schwaier gjithashtu shprehet se është një objekt i mrekullueshëm për t’u vizituar në fundjavë.

Kruja fiton zemrën me Muzeun dhe panoramën

Qyteti i Krujës mbetet një nga destinacionet e zgjedhura nga turistët ditorë që qëndrojnë afër Tiranës. Shumica e vizitorëve janë të impresionuar me qytetin, kulturën dhe Muzeun e Skënderbeut. Duke mos ulur vlerën që ka aspekti kulturor, infrastruktura për të shkuar aty bëhet herë pas here pjesë e kritikës së turistëve.

“Vizita jonë në Kalanë e Krujës ishte paksa aventurë. Udhëtimi atje ishte mjaft stresues pasi mbështeteshim në Google Maps, që na çoi nëpër rrugë jashtëzakonisht të pjerrëta dhe të ngushta duke u ndier krejtësisht jashtë rrugës.

Përfundimisht ia dolëm të mbërrinim, por nuk ishte një përvojë e këndshme. Nëse nuk jeni të sigurt për itinerarin, unë patjetër do t’ju rekomandoja të pyesni vendasit për udhëzime”, – shprehet Peter Hovenac.

“Na pëlqeu shumë kalaja, ajo ofron pamje mahnitëse dhe shëtitja nëpër pazar ishte një përvojë fantastike! Pika kryesore për ne ishte Xhamia e Muhamed Al-Fatih dhe u befasuam që hyrja ishte falas” thotë Etidal Alëazani.

Një tjetër turiste franceze shprehet se për shkak të mjegullës nuk mund të shijoje plotësisht pamjen që ofron panorama nga kalaja, por muzeu është interesant, me pjesë të menduara mirë të cilat flasin për historinë e Skënderbeut, një figurë interesante e Shqipërisë.

Marta, një tjetër turiste, thotë se Kruja ofron gjithçka si në aspektin e kulturës ashtu edhe në atë të natyrës. Nëse do që të bësh një ecje në natyrë dhe të gjesh peizazhe të bukura është e lehtë, por e vetmja gjë që lë për të dëshiruar janë mbetjet që i sheh kudo në Shqipëri.

Yasmin D shprehet se ia vlen një vizitë për të parë kalanë dhe kështjellën dhe pamjet që mund të kesh para syve janë mahnitëse.

Durrësi, mes kontrasteve që çudisin turistët dhe problemit të parkimit

Në Tripadvisor janë një sërë pikash që rekomandohen për t’u vizituar në Durrës të tilla si Amfiteatri, Kulla Veneciane, Muzeu Arkeologjik, Sfinksi. Nëse secilën prej tyre e kërkon për vlerësime në Google duket se turistët kanë qëndrime të ndryshme.

Disa shprehen të çuditur për kontrastin që kanë ndërtimet e kohës së sotme ngjitur me ndërtime që u përkasin periudhave më të hershme. Kjo vihet në duke sidomos për Torrën Veneciane që i takon shekullit XV.

Henrik Puttetrer, nga ana tjetër, edhe pse ka vizituar Durrësin, shprehet se e ka të pamundur që të vizitojë Torrën për shkak se nuk ka askund vende parkimi të lira, madje as në ditë jave.

Milena Maria Cristina Strano shpreh keqardhje që një “thesar” nuk ka marrë vëmendjen e duhur në të shkuarën për mënyrën sesi është ndërtuar. E njëjta përshtypje vlen edhe për Amfiteatrin. Carolina C thotë të njëjtën gjë për ndërtimet.

“Fatkeqësisht, nga jashtë nuk duket mbresëlënëse, për faktin se është betonuar çuditshëm dhe me ndërtime përreth. Hyrja gjithmonë e më në brendësi tregon pa dyshim anën e saj më interesante. Një amfiteatër i fshehur mes ndërtesave të banimit.

Në pjesën e sipërme, kur ecni poshtë ballkoneve, kujdesuni për kokën, nga uji që mund të bjerë nga larja. Kimberly, nga ana tjetër, e cilëson këtë si “një pjesë historie në mes të jetës së përditshme”.

Një pjesë e vizitorëve shprehin rezerva se nuk është shumë i mirëmbajtur apo se si një pikë atraksioni e vetme në Durrës ndoshta nuk do të ngjallte kureshtje për ta vizituar nëse nuk do të ishte pjesë e një pakete vizitash të ndërthurura me të tjera atraksione.

Berati merr vlerësimet maksimale për qetësinë dhe arkitekturën

Qyteti i një mbi një dritareve është një nga destinacionet interesante që po vizitohet gjatë muajve të parë të vitit. Turistët pëlqejnë arkitekturën e qytetit, që është pjesë e trashëgimisë botërore të UNESCO-s, kalanë e qytetit, Muzeun.

“Vizitova Kalanë e Beratit sot dhe m’u duk mahnitëse – një xhevahir i vërtetë i historisë dhe një kënaqësi për syrin. Vendi është i ruajtur mirë, me një mjedis që të lë pa frymë me pamje nga i gjithë Berati dhe malet e bukura përreth. Një vizitë e domosdoshme për adhuruesit e historisë dhe këdo që vlerëson pamjet e jashtëzakonshme. Rekomandohet shumë”, shprehet Jenny që vizitoi qytetin në 1 mars.

Rachel shprehet se kalaja është mjaft e bukur dhe një tur përreth qytetit do të ishte i rekomandueshëm, por ka pak informacione në anglisht sipas saj që e kufizojnë disi eksperiencën.

“Atraksion që duhet parë. Ne bëmë një udhëtim ditor këtu nga Tirana, i cili mori pjesën më të madhe të ditës, por nuk u zgjat shumë. Shumë zona për të shëtitur përreth dhe ju me të vërtetë e ndjeni kudo.

Kaq shumë mundësi të mira për foto dhe pamja nuk zhgënjen. Gjithashtu ka zona të këndshme për t’u ulur dhe për të pirë diçka gjatë soditjes së ambientit. Ne pamë disa shtëpi mikpritëse, kështu që ju mund të kaloni edhe natën në këtë vend shumë të qetë.

Duhet të keni kujdes për shtigjet dhe këmbët pasi është një vend historik dhe ka disnivele të theksuara vende-vende” tregon Jessie.

Turistët mbeten të befasuar nga arkitektura e qytetit dhe lagjet e tij Goricën dhe Mangalemin, duke nënvizuar se ka një organizim të mirë, vende të këndshme për të konsumuar diçka por jo shumë gjallëri si gjatë ditës, ashtu edhe në mbrëmje.

Gjirokastra, qyteti i gurtë “vjedh” zemrat edhe në dimër

Në Gjirokastër nuk kanë munguar turistët as gjatë muajve të ftohtë të vitit. Si pjesë e kulturës së përgjithshme të udhëtarëve globalë “vlerësimet” janë një formë e qartë për të shënjuar këto vizita dhe për të udhëhequr të tjerët drejt eksperiencave më të përmirësuara.

Mjaft të shohim vlerësimet që janë bërë në javët e fundit për qytetin dhe pikat kryesore të tij ku në krye qëndron Kalaja e Gjirokastrës. Shumica vlerësojnë se nga aty mund të shquash çdo pamje mbresëlënëse të qytetit dhe përtej.

“Mund të kisha kaluar ditë të tëra këtu, por ka orar normal pune. Më pëlqeu artileria dhe muzeu brenda ishte i jashtëzakonshëm. Sidomos burgu i vjetër i fshehur brenda kështjellës.

U befasova dhe e shijova kohën time këtu” shprehet Anthony Nork pas vizitës në kala. Një tjetër turiste, Mana Bianconi, shprehet se ky është një vend që ia vlen. “Zakonisht nuk paguaj për kështjella, por më dukej se ia vlente.

Ia vlen ta vizitosh në një ditë me diell për disa pamje të mira. Shkoni sapo të hapet për ta shijuar me më pak njerëz. Harqe të bukura dhe sinjalistikë e dobishme. Brenda tualete falas. Në brendësi avion amerikan dhe topat britanikë.

Vetëm 400 lekë për të hyrë” tregon ajo. Pazari është një tjetër pikë për të cilën turistët flasim pozitivisht dhe që e vlerësojnë në tërësi përvojën me 4 apo 5 yje nga pesë të mundshme./Monitor