Një ngjarje e pazakontë është regjistruar ditën e sotme në sheshin “Skënderbej” në Tiranë, ku disa turistë janë ngjitur mbi monumentin e heroit kombëtar, duke bërë gjeste të pahijshme e të papërshtatshme. Pamjet janë shpërndarë në rrjete sociale dhe kanë shkaktuar reagime të shumta nga qytetarët, të cilët e kanë konsideruar aktin si mungesë respekti ndaj figurës historike dhe trashëgimisë kulturore.
Ky nuk është rasti i parë që monumente të rëndësishme historike në Europë përballen me sjellje të papërgjegjshme nga vizitorë. Në Itali, vetëm gjatë muajve të fundit, disa turistë janë gjobitur rëndë pasi kanë dëmtuar ose abuzuar me monumente të njohura. Në Romë, një turist gjerman u gjobit me mbi 40 mijë euro pasi gdhendi inicialet e tij në Koloseum, ndërsa në Firence një vizitor amerikan u ndëshkua për dëmtimin e një skulpture të periudhës Rilindjes.
Autoritetet shqiptare deri më tani nuk kanë dhënë një reagim zyrtar mbi incidentin në sheshin “Skënderbej”. Por ekspertë të trashëgimisë kulturore kërkojnë vendosjen e masave më të rrepta, si gjoba apo penalitete, për ata që shfaqin sjellje të tilla ndaj monumenteve historike, duke theksuar se respekti për simbolet kombëtare është pjesë e identitetit dhe dinjitetit të një vendi.
