Presidenti i SHBA-së, Donald Trump, deklaroi se Shtetet e Bashkuara kanë kryer një “sulm të shkallës së gjerë” në Venezuelë dhe se gjatë këtij operacioni janë kapur presidenti venezuelian Nicolás Maduro dhe bashkëshortja e tij. Sipas Trump, operacioni u realizua në bashkëpunim me agjencitë amerikane të zbatimit të ligjit dhe Maduro është nxjerrë jashtë vendit.
Lajmi u bë publik përmes një postimi në Truth Social, ku Trump njoftoi se më vonë gjatë ditës do të mbajë një konferencë shtypi në Mar-a-Lago për të dhënë më shumë detaje mbi zhvillimet.
Ndërkohë, zyrtarë amerikanë i thanë BBC se janë urdhëruar sulme ajrore në disa objektiva në Venezuelë, përfshirë kryeqytetin Caracas dhe struktura ushtarake strategjike. Pamjet nga terreni tregojnë shpërthime të fuqishme, flakë dhe kolona tymi mbi qytet, ndërsa banorët raportojnë momente paniku dhe dridhje të forta nga goditjet.
Qeveria e Venezuelës reagoi ashpër duke i cilësuar sulmet si “agresion ushtarak” nga SHBA dhe duke shpallur gjendjen e emergjencës kombëtare. Presidenti Maduro, përmes një deklarate zyrtare, u bëri thirrje forcave politike dhe shoqërore në vend të mobilizohen, duke akuzuar Uashingtonin se synon kontrollin e burimeve strategjike të Venezuelës, veçanërisht naftës dhe mineraleve.
Sipas dëshmive të qytetarëve në Caracas, shpërthimet ishin të forta dhe të njëpasnjëshme. “Zhurma ishte më e fortë se bubullima, shtëpia u drodh dhe frika ishte e madhe,” tha një gazetare lokale për BBC, duke shtuar se pas sulmeve qyteti ka rënë në heshtje, por njerëzit vazhdojnë të kontaktojnë njëri-tjetrin për të mësuar nëse janë të sigurt.
Zhvillimet vijnë pas javësh tensioni të shtuar mes SHBA-së dhe Venezuelës, ku administrata Trump ka rritur presionin ndaj Maduro-s, duke e akuzuar atë për trafik droge dhe përdorimin e të ardhurave nga nafta për veprimtari kriminale. Analistët e BBC e konsiderojnë këtë përshkallëzim si një nga ndërhyrjet më të mëdha ushtarake të SHBA-së në rajon që nga Lufta e Ftohtë, me pasoja potencialisht të rënda për stabilitetin në Amerikën Latine.
